Иртән каһвә эчәргә ярыймы?

Иртәнге аш вакытында кофе эчү гадәте йокыдан уяну максаты белән кергән. Табиб-диетолог, "Маргарита Королева клиникасы" җитәкчесе Маргарита Королева аңлатканча, әлеге эчемлекне иртәнге аш вакытында эчсәң, азык эчендә булган минерал һәм микроэлементларны үзләштерү процессы бозылырга мөмкин.
"Кофе тимер, цинк, магний һәм кальций кебек минералларны үзләштерү процессын боза. Бу минераллар - хатын-кыз һәм ир-атлар сәламәтлеге өчен  нигез булып тора", - дип аңлаткан Маргарита Королева Sputnik радиосына биргән интервьюсында.

Бер чынаяк каһвә хәл кертеп җибәрә анысы, ә менә аны күп итеп эчкән очракта, киресенчә, бөтен хәлне алачак. Бу эчемлек организмны дымсызландыра. Шуңа да күп итеп каһвә эчүчеләргә тәүлек буена аны су белән чиратлаштырырга киңәш итә диетолог.
"Ашарга ярты сәгать кала яки ашап бер сәгать узганнан соң каһвә эчү киңәш ителә. Мондый очракта гына ул файдалы һәм кеше организмында минераль балансны бозмаячак", - дип билгеләде Маргарита Королева.

Фото: https://pixabay.com/ru/

http://shahrikazan.ru/news/kish-tabyish/irtn-kav-echrg-yaryymy