Шикәр диабеты белән авыручылар колагына

– Индира Зөфәровна, хәзер замана чире – шикәр диабеты белән авыручылар күп. Безгә шушы чир белән авыручы бер ханым газета аша табиб киңәшен ишетәсем килә, дип мөрәҗәгать итте. Киңәшләрегезне бирсәгез иде.
– Коръән авыруларны ураза тоту бурычыннан азат итә, бигрәк тә озак вакыт ашамыйча тору кешенең сәламәтлегенә җитди зыян китерсә. Бу турыда Изге Коръәндә Бәкара сүрәсендә 183-185нче аятьләрдә язылган. Шикәр диабеты белән авыручы пациентларга дәвалану буенча кулланмалар Рамазан аенда ураза тотарга киңәш итми.
– Ә шулай да шикәр диабеты белән авыручылар арасында, күңеле белән бирелеп, ураза тотучылар бар. Өлкән яшьтәге бер апа: мин даруны сәхәр ашаганнан соң һәм кояш баткач, авыз ачкач эчәм, хәлем әйбәт, ди. 
– Шикәр чире белән авыручыларга уразаны тотаргамы-юкмы – моны авыру үзе хәл итәргә тиеш түгел. Бу сорауга җавапны, авыруның хәленә карап, бары тик табиб-эндокринолог әйтергә тиеш. Әгәр дә туклануны чикләү авыруның сәламәтлегенә зыян китерә икән, Ураза тотарга кирәкми.
– Ни өчен? Сәбәбен аңлатып үтсәгез иде.
– Чөнки көн дәвамында ашамагач, шикәр диабеты белән авыручының хәле авыраеп, гипогликемия куркынычы туарга мөмкин. Гипогликемия ул – кандагы глюкоза күләменең физиологик нормадан (3,5 ммоль/л) түбән төшүе.
– Әгәр дә табиб авыруның хәленә карап, ураза тотарга ризалык бирә икән, бу очракта авыруга киңәшләрегез?
– Авыруга үзлегеннән диабетны игътибар-контрольдә тотарга, сәламәтлекне дөрес итеп көйләргә өйрәнергә кирәк. Рамазан ае алдыннан мондый өйрәнүләр ураза тотканда һәм анннан соң да гәүдә авырлыгын һәм гликемияне яхшырак контрольдә тотарга ярдәм итәчәк. Ураза тотканда диабетны һәрдаим тикшереп, күзәтеп торган очракта, күрсәткечләрнең начарланып китүен авыру хәзер күреп алачак һәм уразаны вакытында өзеп, туклану режимын дөрес итеп көйлиячәк.
– Кандагы глюкоза күләмен даими рәвештә тикшереп тору тәртибен  җентекләбрәк аңлатсагыз иде.
– Беренче (СД1) һәм икенче (СД2) типтагы шикәр диабеты белән авыручылар  ураза тотканда кандагы глюкоза күләмен даими рәвештә тикшереп торырга тиеш. Кандагы глюкоза күләме арткан яки кимегән очракта кичекмәстән көн дәвамында ашамыйча торуны туктатырга кирәк. Бу бигрәк тә медицина чикләүләре була торып та, сәламәтлегенә куркыныч янаган ураза тотучыларга мөһим. IDF-DAR препараты белән көнгә кан тамчысындагы глюкоза күләмен 7 тапкыр тикшерергә киңәш ителә. Сәхәр алдыннан, иртән йокыдан уянуга, көндез һәм төшке аш вакытыннан соң, кичен ифтар алдыннан, ифтар тәмамлангач, 2 сәгатьтән соң һәм хәл начараеп киткәндә үлчәргә кирәк.
– Киңәшләрегез өчен рәхмәт. Ният кылган Уразаны, сәламәтлеккә зыян китермичә, исән-сау тотарга язсын!