«Алтын куллы мөгаллим» бәйгесе җиңүчесе

       Даутова  Рәсимә Гаделҗан кызы нәрсәгә тотынса,шуны булдыра: башлангыч сыйныф укучылары ясаган төрле эшләнмәләр,үзләре буендагы  уенчыклар,мәктәбебезнең актлар залын бизәп торучы  эре  роза чәчәкләре  генә дә ни тора!”Кулларыннан гөлләр тама”-диләр андый кешеләр турында.Әнә шул хакта язып җибәргән иҗади эшем һәм фоторәсемнәр “Сабантуй” ның октябрь санында басылып чыкты һәм “Республикабызның иң уңган,иң оста укытучылары турында”гы иншалар арасында җиңүче булып танылды.
     Җиңүчеләрне бүләкләү тантанасы Габдулла Тукай әдәби музеенда узды.Әлеге зур чарада Актаныш,Азнакай,Мамадыш,Кайбыч,Биектау,Яшел Үзән районнарыннан,Казан,Чаллы шәһәре мәктәпләреннән дә укытучылар,укучылар килгән иде.Бәйрәм башланганчы кул эшләреннән тезелгән искиткеч матур күргәмә белән танышып чыктык,тәҗрибә уртаклаштык.Аннары экскурсовод Гүзәл апа безне музей буенча экскурсиягә чакырды.Бөек Тукаебыз турында үзем өчен  тагын күп яңалыклар ачтым.Ә экскурсовод  ролендәге роботны күргәч,гаҗәпләнүемнең чиге булмады!Нәп-нәкъ кеше кебек  йөри,аңлатып сөйли бит әле!
     “Сабантуй” лылар Зилә апа Фәйзуллина,Руфия апа Мөхетдинова тапшырган истәлекле   һәм үзенчәлекле бүләкләр бик ошады.Бу зәвыклы,эшлекле апаларга сокланып,укытучым белән горурланып туган мәктәбемә юл алдым.
       Барлык укытучыларыма сәламәтлек,эшләрендә уңышлар телим.
       

Йосыпова Ания, Түбән Аты төп гомуми белем мәктәбенең IX сыйныф укучысы