Арчаның 1 нче балалар бакчасына көз шакыды!

     Көз – бик матур вакыт!  Балалар,  елның  бу  вакытын  яраталар.  Без,  тәрбиячеләр, балаларыбызга көз аеның матурлыгын сөйләргә һәм күрсәтергә  тырышабыз.  Гадәттәгечә,  октябрьнең  икенче яртысында безнең балалар бакчасында барлык төркемнәрдә дә көзге бәйрәмнәр һәм күңел ачулар үткәрелә.  Бәйрәм – тылсымлы сүз!  Барлык  балалар да бу бәйрәмне көтәләр! Октябрь  аенда  балалар  белән  төрле  чаралар  үткәрелде: шигырьләр,  җыр – биюләр, әңгәмәләр, дәресләр, уеннар, табигатькә сәяхәтләр, тасвирлау  хикәяләре  төзелде.  

      Без, тәрбиячеләр, балалар  бакчасында  «көзге  колейдоскоп»  күргәзмәсен   оештырып,  үз  традицияләребездән  чигенмәдек.   Балаларга  ата – аналар белән берлектә төрле һөнәрчелек, табигый материал  эшләнмәләре  тәкъдим  ителде.  Әти – әниләрнең  битараф  калмаулары  һәм  балалар  белән  бергә  кул эшләнмәләре ясауда актив катнашулары  сөендерде. Көзге күргәзмәдә катнашучылар үзләренең фантазиясе, оригинальлеге һәм иҗаты белән гаҗәпләндерделәр. Тәрбияләнүчеләрнең  һәм  ата – аналарның  уртак  продуктив  эшчәнлеге  гаилә  кыйммәтләре  үсешенә уңай  йогынты  ясый.  Бәйрәмгә  әзерлек  гаилә  әгъзаларын  берләштерергә  булыша, балаларны мәдәни  кыйммәтләргә  җәлеп  итә, сәнгатькә һәм  матурлыкка  мәхәббәт тәрбияли, бу безнең җәмгыятькә бәяләп  бетергесез  өлеш  кертә.  

     Балалар бакчасының педагогик коллективы безнең белән бергә балаларын иҗади эшчәнлеккә җәлеп итүче  ата – аналарга рәхмәтен белдерә. Сез үзегез дә һәм гаиләгез дә күпме горурлык бүләк иттегез, балаларның өметләрен һәм аларның  бар нәрсәгә ышануларын  акладыгыз.

Алинә  Хисмәтуллина,

беренче  кечкенәләр  төркеме  тәрбиячесе