Арчаның беренче балалар бакчасында 8 Март бәйрәмен үзенчәлекле итеп каршы алганнар

Сезгә булган безнең хөрмәтебез

Урын алсын йөрәк түрендә.

Шатлык һәм куаныч, зур бәхетләр

Юлдаш булсын сезгә гомергә, дип башланып китте Арча районының 1 нче номерлы балалар бакчасында зурлар төркемендәге 8 нче Мартка багышланган бәйрәм кичәсе.

Бу бәйрәм иртәсе башкалардан  үзенчәлекле булуы белән аерылып торды. Ни өчен дисезме? Бәйрәмгә балалар телевизион тапшырулар әзерләгән иде. Балалар экран аша “Хәбәрләр” программасында 8 нче Март белән тәбрикләү сүзләре әйттеләр, сөйләделәр һәм күңелле җырлар башкардылар. “Әбиемдә кунакта” тапшыруында балалар әбиләрен ничек яратырга, ничек хөрмәт итәргә кирәклегенә төшенделәр.

Бию малайлар һәм кызлар өчен бик файдалы шөгыль. Малайлар, әниләрен котлап,  эшләпә киеп, джаз көе астында ялкынлы бию тәкъдим иттеләр, ә кызлар исә башларына таҗлар киеп, назлы музыка белән берлектә романтик бию күрсәттеләр. “Мода күрсәтү” конкурсы да бик күңелле узды. Кызлар иң яраткан киемнәрен киеп, бизәнеп чыгыш ясадылар.

Соңрак тәрбиячеләр, балалар белән берлектә Фәнис Яруллинның “Кояштагы тап” исемле спектаклен сәхнәләштереп күрсәттеләр. Әлеге әсәр ана белән бала мөнәсәбәтләрен ачып сала. Бу әкият балаларның сөйләм телен үстерергә, ялган сөйләргә ярамаганын, әниләрне тыңларга кирәклеген өйрәтә. Бу әсәрдә малай авырткан әнисенә тупас эндәшеп, сүзен тыңламаган. Соңыннан малай үз гаебен танып әнисеннән гафу үтенгән. Малай гафу үтенгәч, бар нәрсә элекке хәленә кайткан. “Начар эш эшләсәң, барыбер беленә”, дигән мәкалне нигезгә ала әлеге әсәр. Әкиятне балалар “Әнием-кадерлем” җырын җырлап тәмамлыйлар.

Бәйрәм азагында балалар ике төркемгә бүленеп “Коймак пешер” дип аталган уенда көч сынаштырып карадылар. Ә әниләр “Үз балаңны танып бел” дигән уенда катнаштылар.

 Әни кешегә бүләк алу һәрвакыт күңелле, ә баланың куллары белән ясалган әйберләре күп тапкыр кыйммәтрәк һәм мөлаемрак була. Балалар әниләрен котлап үз куллары белән ясаган бүләкләрен тараттылар. Әлегә бәйрәм кичәсе балаларның  әниләренә кадерле бүләк булып барып ирешкәндер дип ышанасы килә.

Гүзәл затларыбызны язгы матур бәйрәм белән котлыйбыз. Кадерле әниләр булып, кадерле әбиләр булып озак яшәүләрен телибез.

Арча районының 1 нче номерлы балалар бакчасының тәрбиячеләре

Алинә Хисмәтуллина, Гөлназ Хәкимова, татар теле тәрбиячесе Гөлназ Камалиева