“Бәхет йолдызым күкләрдә”

    21 февральдә дөньякүләм туган тел көне билгеләп үтелә. ЮНЕСКО тарафыннан игълан ителгән әлеге халыкара бәйрәм дөньядагы телләрне саклау  макстатыннан оешты. Безнең телебез – татар теле.  Телебезнең кулланылыш даирәсен киңәйтү, аны балаларыбызга һәм киләчәк буынга тапшыру – безнең төп бурычыбыз. Бала үзенең туган телендә дөрес итеп сөйләшеп һәм аның белән бергә башка чит телләрне дә өйрәнсә, зирәгрәк була, телләрне тизрәк үзләштерә дигән фикер яши.
       Шул уңайдан,  безнең ”Күбәләк” балалар  бакчасында Арча шәһәренең Үзәк китапханә каршында эшләп килүче"Каурый каләм"берләшмә җитәкчесе, үзешчән шагыйрә Абдуллина Дилә Вансит кызы белән очрашу булып узды. Кичәнең башында ук Дилә ханым үзенең  мөлаемлыгы, гадилеге, матур сөйләме белән безне әсир итеп куйды. Ул - бала күңелен аңлый белә торган шагыйрә. 
Кичәдә балалар талантлы шагыйрәнең шигырьләрен сөйләделәр, матур җырларын башкардылар.Мәктәпкә әзерлек төркеме балалары Дилә ханымның "Болында"күренешен сәхнәләштерделәр.Яраткан тәрбиячеләребез шагыйрәнең өлкәннәр өчен язылган туган тел, мәхәббәт, ватанпәрвәрлек, туганлык темаларына шигырьләр сөйләделәр.Шулай ук балалар  шагыйрәбезгә аның иҗатына карата сораулар да әзерләп килгәннәр иде.Дилә Вансит кызы бик теләп сорауларга җавап бирде, үзенең яраткан шигырен балаларга яттан сөйләп күрсәтте. Билгеле булганча, Дилә  Абдуллина үзебезнең туган  якка  дан җырлаучы шагыйрә. Бу аның иҗатында да бик ачык чагыла. Гүзәл Арчабызга,  туган авылына, аның кешеләренә, табигатькә, туган нигезгә  мәдхия – талантлы шагыйрәнең иҗаты иң беренче чиратта әнә шуның белән үзенә җәлеп итә.Ул шигырьләрендә әхлак, күңел чисталыгы, милләт өчен борчылу темаларын алга сөрә. Укучыларына да  изге сыйфатларны, рухи кыйммәтләрне шигырьләре аша сеңдерергә тырыша.
     Кичәбездә  мәртәбәле кунаклар Арча шәһәре балалар китапханә җитәкчесе  Рәхимбаева Алсу Гарифҗан кызы һәм Арча шәһәренең мәгариф идарәсенең мәктәпкәчә белем бирү  методисты Иманаева Алинә Радик кызы да катнашты.Алар  балаларның чыгышларын матур алкышларга күмделәр һәм барлык катнашучыларга рәхмәт хисләрен белдерделәр.
     Очрашу бик җылы һәм күтәренке рухта үтте. Әлеге күркәм очрашу, әлбәттә инде, сөекле Тукаебыз иҗат иткән үлемсез «Туган тел» җыры белән тәмамланды. Бәйрәм ахырында шагыйрә барлык катнашучыларга  үзенең шигырь җыентыкларын һәм тәмле күчтәнәчләрен тапшырды. Әлеге очрашу әле барыбызның күңелендә озак сакланыр дип,  ышанып калабыз!

  “Гомуми үсеш бирү төрендәге Арча 11 нче номерлы балалар бакчасы" 
татар теле тәрбиячесе  Вәлиева Зөлфия Җомагыл  кызы, бакчабызның психологы Йосыпова Гүзәл Ринат кызы