“Дөньяда иң-иң матур тел - ул минем туган телем”: Арчаның икенче балалар бакчасында туган тел айлыгы узды

    21 февральдә Халыкара туган тел көне билгеләп үтелә. ЮНЕСКО тарафыннан игълан ителгән әлеге бәйрәм дөньядагы телләрне саклау, аларны киләчәк буынга исән-имин җиткерү макстатыннан оешкан. Бүгенге көндә галимнәр Җир шарында 7 меңнән артык тел булуын әйтәләр. Хәзерге заманда күпчелегебез ким дигәндә 2-3 телне камил белә. Һәр халыкның теле үзенчәлекле, күп телләр белү дөньяга карашны киңәйтә, төрле милләт халкының мәдәниятен тирәнрәк белергә ярдәм итә. Ләкин туган тел ул бер генә була. Безнең телебез – татар теле. Шуңа күрә һәр татар кешесе үз теленә хөрмәт белән карарга тиеш. Сабыйларыбызның теле туган телдә ачылсын. Телебезнең кулланылыш даирәсен киңәйтү, аны балаларыбызга һәм оныкларыбызга тапшыру – безнең төп бурычыбыз.

Халыкара туган тел көне безнең балалар бакачасында да бик зурлап үткәрелә. 3нче февральдән 26нчы февральгә кадәр туган тел айлыгы булып узды. Шул уңайдан бик күп чаралар уздырдык.

Балалар өчен китаплар күргәзмәсе оештырылды. Барлык төркемнәрдә туган телдә матур әдәбият белән танышу өстендә эшләүне тагын да арттырдык. Кечкенәләр төркеме балалары белән татар халкының милли киемнәре белән таныштык. "Түбәтәй" уенын уйнадык. Бу шөгыль татар халкының милли киемнәренә, уеннарына кызыксыну уяту максаты белән үткәрелде. Ә мәктәпкә әзерлек төркеме балалары арасында туган телебезне белүләрен ныгыту максатыннан “Туган телем – Тукай теле” исемле викторина уздырылды.

Шулай ук бу айда Бөек шагыйребез Муса Җәлилнең туган көненә багышлап “Муса абый бүләге” шигырь бәйгесе һәм аңа багышланган әдәби - музыкаль кичә оештырдык. Балалар аның шигырьләрен сөйләделәр, сәхнәләштерделәр. Мәктәпкә әзерлек төркеме балалары аның тормыш юлын, кылган батырлыкларын чагылдырган бик матур, тетрәндергеч күренеш әзерләделәр. Муса Җәлил үзенең үлемсез әсәрләре белән, туган иленә тугрылыгы белән һаман да халык күңелендә, безнең йөрәкләрдә яши. Халык аны мәңге онытмас.

“Казан арты” тарих-этнография музеенда герой-шагыйрь Муса Җәлилне искә алу кичәсе булып узды. Анда да безнең балалар бик матур чыгышлары белән сөендерделәр. Шагыйрьнең татар һәм рус телләрендә шигырьләрен сөйләделәр, “Карак песи” шигырен сәхнәләштерделәр.

Әлеге айда әти-әниләребез дә читтә калмады. Алар “Туган телдә укыйбыз” акциясендә бик теләп катнаштылар. Ә тәрбиячеләребез флешмобка кушылып туган тел турында шигырьләр укыдылар.

Туган тел айлыгын йомгаклау чарасы буларак, 21 нче февраль балалар бакчасында Халыкара туган тел көне уңаеннан бик матур бәйрәм чарасы узды. Бәйрәмнең төп максаты - Халыкара туган телләр көне турында мәгълүмат алу гына түгел, ә балаларны төрле милләтләр белән тыныштыру, аларның күп төрлелегенә игътибар бирү, телләрне кече вакыттан үк өйрәнүгә кызыксыну уяту. Күпмилләтле Республикабызда туган телебезгә ихтирам, мәхәббәт хисе аша һәр халыкның теленә талерантлык хисе тәрбияләү. Балалар халык аваз иҗаты, мәкаль-әйтемнәр, халык уеннары, җырлар аша  туган телебезнең бай, матур, җырлы-моңлы булуын күрсәттеләр.

Татар халык мәкале: “Туган телне кадерләгән халык кадерле булыр”, – ди. Туган телләребезне саклыйк, яклыйк, чөнки милләтнең яшәешендә туган тел иң мөһим урыннарның берсен алып тора.

Ландыш Фәхретдинова,

Арчаның 2нче номерлы балалар бакчасы

Татар теленә өйрәтү буенча тәрбияче