Кем ул телне саклаучы?

Ул – үз эшенең остасы, балалар белән җайлы гына уртак тел таба белгән, профессиональ педагог. Без аның белән укыту өлкәсендәге казанышлары, татар телен саклау юллары, шулай ук, башка укытучыларга киңәшләре турында сүз алып бардык.

– Миләүшә Рафисовна, “Ел укытучысы” бәйгесендәге казанышларыгыз белән котлыйбыз! Мондый зур бәйгедә урын яулауның сере нидә?

– “Ел укытучысы” бәйгесендә татар укытучылары ел саен актив катнашалар. Мин дә мондый бәйгеләрдә күптәннән актив катнашып киләм. Республика күләмендәге бәйгеләрдә дә призлы урыннарым бар. Урын яулауның сере дип, үз фәнемне яратуны атар идем. Татар теле һәм әдәбияты фәнен Тукай җирлегендә укыту – укытучы өчен зур җаваплылык та.

– Сезнең татар теле дөньясында тәҗрибәгез зур. Телебезне белү дәрәҗәгезне ничек саклыйсыз?

– Телне һәрвакыт “чарлап” торсаң гына, билгеле бер дәрәҗәдә уңышларга ирешеп була. Беренчедән, сөйләм телем әдәби әсәрләр уку аша камилләшә бара. Бик тә китап укырга яратам. Бала чагымда китапханәдә мин укымаган китап калмагандыр. Укучыларымны олимпиадаларга әзерләгән вакытта, “Татар теле” дәреслекләрен кабат-кабат укыйм. Үзем өчен дә яңалыклар ачам.

– Сезнең исемегез Ризаэтдин Фәхретдин исемендәге премия номинантлары арасында да бар. Мондый зур уңышка ирешүегезнең сәбәбе нидә?

– Ризаэтдин Фәхретдин исемендәге премия – күпьеллык хезмәтемнең нәтиҗәсе. Мәктәбебездә ел саен Габдулла Тукай укулары үткәрелә. Бу республикакүләм укулар мәктәбебездә быел 14 тапкыр үткәреләчәк. Укуларның оештыручысы булып торам. Нигезләмә төзүдән башлап, соңгы беркетмәгә кадәр күп эш башкарам. Шул эшчәнлегем өчен бу премияне бирделәр дип саныйм.

– Яшь татар теле укытучыларына нинди теләкләрегезне җиткерер идегез? Үзегездән нинди киңәшләр бирер идегез?

– Иң беренче, балаларны яратырга кирәк. Һәр баланы үз балаң кебек якын иткәндә генә, укучылар белән эшләү рәхәтлек китерә. Икенчедән, үз фәнеңне бик яхшы белергә кирәк. Укучыларның сорауларына да төгәл итеп җавап бирә алырга кирәк бит. Әдәбият укытучысы китап укырга тиеш. Атнасына бер сәгать кергән әдәбият дәресендә әсәрне яхшы белгән очракта гына җиткерү мөмкин.

– Әгәр татар теле булмаса, кайсы фәнне үз итәр идегез?

– Татар теле укытмасам, тарих, география яки рәсем укытучысы булыр идем. Бу фәннәрне дә яратып укыдым. Математика фәненнән укытучым минем аның юлыннан китүемне теләгән иде. Тик туган телем фәнен сайлаганга бер дә үкенмим.

Алинә Ганиева,” Нур “ телестудиясе укучысы