Күгәрчен - тынычлык кошы

Әюп абый янына баруым очраклы гына түгел. Кошлар яратучы бит ул безнең, күгәрченнәр тәрбияләүче. Күгәрчен борынгыдан ат, мәче, эт һәм башка йорт хайваннары кебек үк, адәм баласының тугрылыклы юлдашы булган. Беренче карашка әлләни матур да булмаган, бик тә гади бу кошларга мәхәббәт каян килә соң Әюп абыйга?

- Мин күгәрченнәрне кечкенәдән яраттым. Армия сафларына киткәнче күгәрченнәр тоттым. Шушы кошларны яратам шул. Акча китерә торган хайваннар түгел, нәрсәгә алар сиңа, диючеләр дә бар. Акча өчен түгел күңел өчен тотам мин аларны, – диде ул. - 46 ел үткәч яңадан яраткан кошларымны үрчетергә алындым.

Һәрбер эшнең үзенең тәртибе бар шул. Күгәрченнәренә иң беренче балкып торган өй булдырган Әюп абый. Өйләре бүлмәләргә бүленгән. Һава суларга балконнары да бар, өй алды, җылы бүлмә, йомырка салып бала чыгару кабинетларына кадәр бар. Кошлар яратмасаң мондый шартлар тудырып була димени!

Әюп абыйның күгәрченнәре белән сөйләшкәнен күзәтәм. Очып китәләр дә, кире аның янына очып кайталар. Зәңгәр күктә ап-ак күгәрченнәр бөтерелеп уйнаклап очалар. Вакыт-вакыт түбәнгәрәк төшеп әйләнәләр, әйтерсең лә алар: «Без монда, күз уңында гына» дип искәртәләр. Ничек кире кайталар соң алар, дим?

 - Алып кайткач та берәрсе югалды. Хәзер өйрәнделәр инде, кире кайталар. Зәңгәр төс белән ясадым ояларын да, табарларына җайлырак булсын, ачык булып күренеп торсын, дип әйттем, – ди Әюп абый. - Ашаган җиренә сыер да кайта , дигән мәкаль бар бит. Менә күгәрченнәр дә тәрбияләгәч, ашаткач кире кайталар.

Бодай, арпа, көнбагышны яратып ашыйлар икән. Әюп абыйга күгәрченнәрне дусты Илдус абый бүләк иткән . Ә хәзер шул күгәрченнәр йомырка салып бала чыгарганнар. Нәни күгәрчен балаларын да күрү бәхетенә дә ирештем.

-Тынычлык кошлары бит алар. Күкләребез һәрчак аяз булып, анда бары тик тынычлык символы булган ак күгәрченнәр генә очсын! – ди Әюп Хатыйп улы Фатыйхов.

Без дә аның матур теләкләренә кушылабыз.

Гарифуллина Айсылу Мансур кызы
Күлтәс авылы китапханәчесе , клуб мөдире