Сезнең гомер матур җыр кебек...

Тамашачы белән тулы зал, сәхнә тулы чәчәкләр, бүләкләр, тамашачының көчле алкышлары – болар бар да Зөлфиянең хезмәтен югары бәяләү, зурлау, олы ярату, хөрмәт итү. Авыл үзешчәннәре белән балалары, оныклары, туганнары һәм күрше-тирә авыл мәдәният йорты хезмәткәрләре чыгыш ясады.

Арча мәдәният идарәсе исеменнән Данис Гайфуллин котлады һәм үзенең матур җырларын бүләк итте. Ташкичү авыл җирлеге башлыгы Рәдис Хәбибуллин Рәхмәт хаты һәм истәлекле бүләк тапшырды. Иске Ашыт мәдәният йорты директоры Гөлсинә Халикова, авылның мөхтәрәм кешесе Нургаяз Вәлиев матур теләкләр әйттеләр, җылы котлау сүзләрен җиткерделәр. Мәдәният хезмәткәре – ул сәнгать аша кешеләрнең күңелен, рухын дәвалаучы, дөньяга, тормышка матурлык өстәүче. Мәдәнияттә чын иҗат кешесе булмасаң, кешеләрне яратмасаң, алар күңеленә матур тәэсир итәрлек сүзләр таба белмәсәң, мәдәният өлкәсендә эшләп булмый торгандыр ул. Төрле сикәлтәле юллар, авырлыклар, сайланулар һәм тәвәккәллек аша үзенең күңеленә хуш килгән һөнәрне эзләп табучы мәдәният хезмәткәре ул. Зөлфия Габдуллаҗан кызының республика, район, авылыбыз алдында куйган тырыш хезмәте зур. Аның тынгысыз җаны, йокысыз төннәре, сәләмәтлеге һәм борчу-мәшәкатьләре белән сугарылган тормыш юлы – 50 ел гомере мәдәнияткә багышланган. 

Зөлфия Фәтхуллинаның үткән гомере һәм хезмәт юлы яшь буынга маяк булырлык. Биш дистәдән артык  гомер эчендә авырлыклар, мәшәкатьләр һәм шатлыклары да күп булгандыр. Ул үз эшенең остасы, эшләгән эшенең нәтиҗәсенә сөенә торган кеше. Мәдәнияттәге хезмәтләре өчен Зөлфия Фәтхуллина район һәм республика тарафыннан күп кенә Мактау грамоталары һәм Рәхмәт хатлары белән бүләкләнә. 2003 елда мәдәният өлкәсендә иң яхшы нәтиҗәләргә ирешкән һәм намуслы хезмәте өчен Арча районы хакимият башлыгы карары белән “Үз һөнәренең остасы” дигән таныклык һәм күкрәк билгесе белән бүләкләнә. Гомер буе туган җирне сөеп, яратып, туган авылым дип җан атып,  янып-көеп, шул җирдә намуслы хезмәт итеп яшәүче Зөлфия кебек кешеләр – тормышыбызның күрке. Узган гомер юлын барлаганда үзеннән канәгать булган кешеләр бик сирәк. Зөлфия Габдуллаҗан кызы үзенең һәр яшәгән көнен халкына хезмәт итеп, мәдәният өлкәсендәге башкарган эшләренә сөенеп яши. Һәр бәйрәм, кичәләргә үзе сценарийлар төзеп, үзешчән артистларга репетицияләр ясатып, сәхнәгә чыгарга әзерли. Ул сәхнәне, тамашачыны хөрмәт итте. Ә тамашачы аны хөрмәт итте. 

Зөлфиянең хезмәте миңа ул мәдәният йортына эшкә кергәннән бирле таныш. Әни Саярә Фәттерахманова мәдәният йортында эшләгәнлек белән мин гел клубта, сәхнәдә булдым. Без аның белән бергә җырладык та, биедек тә, скетч, спектакльләр дә уйнадык. Мин аның талантына, хезмәтенә бик гашыйк идем. Әйтерсең ул сәхнә өчен туган. Алаһы Тәгалә аңа талантны жәлләмичә биргән. Миңа әле аның белән бергә мәдәният йортында да эшләп алырга туры килде. “Саяра” халык театрының әйдәп баручы артисты да әле ул. Үзе эшли башлаганннан бирле куелган спектакльләрдә уйнаган рольләрен санап бетергесез. Төрле образлар тудырды. Усал хатыннарны да, өлкән яшьтәге әбиләрне дә, җүләр-җүнсезләрне дә уйнады. Уйнаган һәр образыннан,  сәхнәдән тәм, рәхәтлек табып, зур осталык белән тамашачылар каршында чыгышлар ясады. Спектакльләр өйрәнгәндә репетицияләр төнге сәгать 12ләргә кадәр бара. Ә инде авылларга спектакльләр белән баргач, тагын төн урталарында кайтыла. Иртәгесен мәдәният эше, йорт эшләре. Бүгенге көнгә кадәр аның арыдым, туйдым бу эштән дигән сүзе ишетелмәде. Чөнки ул үз эшен бик яратып эшләде. Аны авылның олысы, кечесе ярата, хөрмәт итә. Зөлфия белән Таһирның балалары да җырлый. Таһир яшьтән мәрхүм булды. Балалары төрле чараларда сәхнәдә чыгышлар ясый. Зөлфия ике ул һәм бер кыз үстерде. Аларның  хәзер үз тормышлары, әни дип ярдәмләшеп яшиләр. Ул хәзер оныкларына матур, ягымлы дәү әни дә. 
Зөлфия ханым тормышны, эшен яратты. Барысына риза булып, шөкер итеп яши. Бөтен яшәешен сәхнәдән тапты. Сәхнәдән, мәдәнияттән башка тормышны күз алдына китерә алмыйм, ди ул.

Фердинанд Фәтхи,
Татарстанның халык артисты