Ватанны саклаучыларга дан!

Арчаның 3 номерлы мәктәбендә Ватанны саклаучылар елын ачуга багышланган патриотик чара үтте. Коллектив бу чарага зур тырышлык куеп әзерләнгән иде. Чара тантанылы рәвештә укучыларның Россия һәм Татарстан гимннары җырлавы белән башланып китте. Залда утырган һәр кеше дулкынланып торып басты. Ә инде укытучылар ансамбле хәрби формадан “Журавли” җырын башкарганда залдагыларның күзләре яшьләнде.

  “Сугышчан туганлык” оешмасы җитәкчесе Багаутдинов Сергей Лимус улына сүз биргәч, залда тынлык урнашты, чөнки ул күп тапкырлар хәрби операцияләрда катнашкан офицер, үз күзе белән күргән, үз йөрәге аша уздырган сугыш әфәтләре турында сөйләгәндә күз яшьләрен тоеп тора алмады. Сергей Лимусович бүгенге көндә  махсус опреция зонасында булган хәлләр белән дә таныштырып үтте. Офицерның балаларга теләге бер генә иде” “Үз илегезне саклый торган чын  гражданнар булып үсегез, Иллебезне яратыгыз!”

  Район Мәгариф идәрәсе методисты Файзрахманова Алия Ильсур кызы  мәктәп коллективының патриотик тәрбия бирү өлкәсендә нәтиҗәле эшләүен ассызыклады, балаларның, әти-әниләрнең махсус хәрбия операция зонасына гуманитар ярдәм җибүрәдә актив катнашулары өчен рәхмәт сүзләре җиткерде.

   Арча районы Ветераннар советы җитәкчесе Хамидуллина Рамзия Шәрип кызы район халкының безнең ирегебезне саклап көрәшүче солдатларга нинди ярдәм күрсәтелеү, безнең волонтерларның алар белән даими элемтәдә булулары хакында дәлилләп сөйләде.

  Һәр концерт номеры чакырылган кунакларның чыгышлары белән чиратлашып барды. Нәни артистларның һәр чыгышы көчле алкышларга күмелде. Кышкы каникулдан соң, шушы аз гына вакыт эчендә, башлангыч сыйныф укучыларын җитди тематик кичәгә әзерли алган педагог-оштыручы Шакирова Рузалия Тәлгат кызына, сыйныф җитәкчеләренә рәхмәттән башка сүз юк, һәм аларның кайберләрен атап китмәсәк дөрес тә булмас.

 Һәр сыйныф бүгенге чарага үзеннән зур өлеш керткән иде. 2Б сыйныф укучылары “Бравые солдаты” җырын чын солдатларча тырышып башкардылар, ә 2А сыйныф укучысы Низамиев Рафаил “Киек каз юллары” җырын илһамланып, бәтен күңелен биреп җырлады. 3нче А сыйныф укучылары матур итеп тынычлык турында җырладылар. 4А сыйныфта укучы егетләре “Спецназ” биюен оста итеп башкардылар, ә 4Б сыйныф укучылары М.Җәлил әсәрләре буенча”Сугыш кайтавазы” дигән театральләштерелгән күренеш тәкъдим иттеләр. Балалар чын-чынлап рольга кереп уйнадылар.  4А сыйныф укытучысы Шамеева Самина үзенең бабасы, сугыш ветераны Шәүкәт Җәләл улы турында язылган эссесе белән таныштырды. Музыка укытучысы Муратова Ләйләнең саф, моңлы тавышы белән “Ах, эти тучи в голубом” дип җырлавы – нур өстенә нур булды!

 Рус теле һәм татар үзенчәлекләрен истә тотып, сәнгатле сөйләмгә әһәмият биреп төзелгән программаны алып баручылар – Сабирова Люзия Салават кызы һәм Усаева Карина Игоревна, оста итеп тамашачыга җиткерделәр.

   Балалар бакчасы тәрбиячесе Хакимова Равилә хәзерге вакытта үзенең ире Марсельнең махсус опреация зонасында контракт буенча хезмәт итүен, берничә тапкыр яраланып госпитальда ятуын, тернәкләнгәч тагын китүен ачынып сөйләде һәм тормыш иптәше турында видеоязма күрсәтте.

    Кичәгә әниле-кызлы Ивановлар да чакырулы иде. Аларның уллары Иванов Илнур-шушы мәктәп укучысы, күптән түгел канлы бәрелештә һәлак булып, Арча районына алып кайтып күмелгән егет. Аның турында сыйныф җитәкчесе Гөлнара Таһирҗан кызы сагынып сөйләде. Әле көз көне генә кыска вакытлы ялга кайтып киткән чакта мәктәпкә очрашуга килгән булган ул. Шул турыда видео кадрлар да күрсәтелде. Илнурның әнисе Илһамия һәм әбисе Хәдичә күз яшьләрен тыя алмыйча, шушы кырыс чынбарлык белән килешмичә, елап утырдылар. Аларга бөтен зал теләктәшлек итте: Тәңребездән исәннәргә сабырлык, ә үлгәннәргә тынычлык сорап, бер минутлык тынлык игълан ителде. Равилә, Илһамия, Хәдичә ханымнарга мәктәп укучылары рәхмәт йөзеннән  чәчәк бәйләмнәре тапшырдылар.

  Кичә ахырында мәктәп директоры Гөлнара Рафис кызы мондый чараларның һәр кешегә зур әһәмияте турында ассызыклады, Ватанны саклаучы елында  үткәреләсе чаралар турында әйтеп үтте, килгән кунакларга, әти-әниләргә зур рәхмәтләрен җиткерде.

 Кичә тәмам... Ә хисләр ташкыны йөрәкләргә уелып калды, һәр көннең кадерен, тәмен белеп яшәргә йөрәтә торган чара булды бу.

Рәхмәт газиз 3 мәктәбебезгә, рәхмәт аның чын патриотлар тәрбияләүче коллективына!

                                                             Ветеран укытучы Наилә  Миннемуллина.