«Әти бер кат кием белән урамда калды» - каза күргән гаилә янгында күршеләрен гаепли ("Интертат")

автор, 6 апрель 2022 - 08:40

1821

Янгын бар булганны бер мизгел эчендә көлгә әйләндерә дә куя. Ульян өлкәсе Иске Кулатка районы Иске Мостяк авылында яшәүче 76 яшьлек Рафаэль Байбиков янгын аркасында урамда калган. Янгын турында кызы Гүзәлия сөйләде.

«Әти бер кат кием белән урамда калды» - каза күргән гаилә янгында күршеләрен гаепли ("Интертат")

27 март көнне кичке сәгать сигезләрдән соң булды бу афәт. Безнең йортка терәп үк күршеләребезнең сарайлары, мунчалары салынган. Алар мунча кереп чыгалар да, газ мичләрен сүндерергә оныталар. Ул кызып, ишектән сарайга бәрә, аннары ут безнең йорт түбәсенә күчә.

Күршеләр башта аны «җәйге кухня» итеп кенә салганнар иде дә, аннары мунча итеп төзеп куйдылар. Шунда янкорма салып машина өчен дә урын ясадылар. Болай терәп салырга ярамаганлыкны әйтә килдек, тик безне тыңлаучы булмады, – ди Гүзәлия Байбикова.

Фото: © Гүзәлия Байбикованың шәхси архивыннан

Күрше дигәннәре – Рафаэль Байбиковның бертуган энесе. Гүзәлия ханымның әтисе янгын чыкканда өйдә үзе генә була.

Әти чәй эчеп утыра торган булган. Шарт-шорт иткән тавышлар ишетеп, урамга чыгып карый. «Өй өсте, түбәсе кып-кызыл булып дөрләп яна иде», – ди. Өйгә кире кереп өстәлдә яткан телефонга сузыла, тик ул инде янган, эрегән була. Иске бер кат кием белән әти урамда калды, – ди Гүзәлия.

Янгын турында Гүзәлия авыл группаларына язганнардан белеп ала. Үзе бу вакытта Ульян шәһәрендә була. Әтисе белән бергә бер йортта яшәгән Резидә дә янгын чыкканда шәһәрдә була. Авылның янгын сүндерүчеләре тиз килеп җитә.

Без шул ук көнне авылга кайтып киттек. Без кайтканда әти урамда басып тора иде. Итекләре суда... Куллары бераз пешкән, үзе сөрем газы да сулаган булган. Килгән янгын сүндерү хезмәткәрләре күршеләрнең йортларын саклап, ул якка су сибеп торганнар. Безнең йорт тулысынча янып беткән. Район җиреннән дә килгән янгын сүндерүчеләр, тик соңрак.