Арск-Информ
  • Рус Тат
  • "Ак чәчәкләр"дә машина откан табиб:"Эшли башлаганда кешеләр минем янга керми иде..."

    Бүген "Казан Экспо" Халыкара күргәзмәләр залында "Ак чәчәкләр- Ел табибы" премиясен тапшыру тантанасы булды ("Шәһри Казан", Лилия Локманова).

     

    Быел табиблар биш номинациядә ярышкан: "Сәламәтлек саклау легендасы", "Беренче звенода иң яхшы табиб", "Елның иң яхшы медицина хезмәткәре", "Үзенчәлекле очрак" һәм "Ел табибы". Моннан тыш, традиция буенча, Татарстан Президенты Рөстәм Миңнеханов исеменнән бер табибка машина тапшырыла. Әлеге бүләккә быел 

    Бавлы районы Мортаза фельдшер-акушерлык пункты җитәкчесе Рәзинә Мөгыйновага лаек булды. 

    Медицина өлкәсендә чын-чынлап үз һөнәрен яратканнар гына эшли аладыр. Рәзинә Мөгыйнова моңа ачык мисал.

    "Мин медицина өлкәсендә инде 32 ел эшлим. Бәләкәйдән курчаклар, хайваннарны дәвалап уйный идем. Унынчы сыйныфны бетергәч, иптәш кыз белән сөйләштек тә, медицина училищесына укырга кердек.1990 елда училищены тәмамладым да, шуннан бирле эшлим. Эшли башлаганда 20 яшьлек кыз идем. Мин бала вакытта шундый хәлләр булды, әгәр дә ул чакта хәзерге белемнәрем булса, мин аларга ярдәм итә алыр идем дип уйлыйм. Тик мин әле бала гына булганмын.   

    Кешеләргә ярдәм итәсем килә. Үз вакытымны да, үземне дә жәлләмим. Авыру кеше янына барсам, аның хәле яхшырмыйча, яныннан китмим. Кешене терелтер өчен бөтен барлыгымны бирәм. Ә алар миңа чын күңелдән рәхмәт әйтә",- ди Рәзинә ханым.

    Әлбәттә эшли башлаганда яшь белгечкә җиңел булмый. Бигрәк тә авылдашларының ышанычын яулау авыр бирелә.

    Реклама

    "Беренче елны эшләгәндә кешеләр минем янга бик керми иде, яшермим. Мин ишекне ачып, миңа керсеннәр инде дип утыра идем. Эшли-эшли тәҗрибә тупладым. Хәзер инде медпункт ишегем бер дә ябылмый. Минем янга киләләр икән, димәк, мин аларга кирәк",- дип сөенә фельдшер. 

    Авыл җирендә фельдшерның ялы да, бәйрәме дә, төн йокысы да юк. Шуңа да медицина хезмәткәренең тормыш иптәше дә сабыр, аңлый торган булырга тиеш. 

    "Беренче вакытта авыр булды. Сөйләшеп, аңлаша идек.Авыл җирендә бер машина белән "вызов"ка чыгып китәсең, икенче машина белән китереп куялар. Хәзер төнлә чыгып китеп, өчәр сәгать йөреп кайтам. Кайчагында белмичә дә калалар",- ди ул.  

    32 ел эшләү дәверендә ул бер генә авыр очракка тап була. Әти-әнисе хәмер белән мавыга торган 2 яше дә тулмаган баланы гаиләдән алырга туры килә аңа. 

    Ә менә коронавирус пандемиясен дә бер югалтуларсыз җиңүләренә сөенеп бетә алмый табибә.

    Тулырак: http://shahrikazan.ru/news/yazmalar/ak-chchklrd-mashina-otkan-tabibeshli-bashlaganda-keshelr-minem-yanga-kermi-ide

    Хәзер Арча һәм Арча районы яңалыкларын безнең Telegram-каналдан да белә аласыз

     

    Иң мөһим һәм кызыклы язмаларны Татмедиа Telegram-каналында укыгыз


    Реклама

    Нравится
    Поделиться:
    Реклама
    Комментарии (0)
    Осталось символов: