Казан мәктәбендә атышта имгәнгән кызны Мәскәү клиникасыннан чыгардылар

Казанның 175нче мәктәбендә фаҗига вакытында имгәнгән кызны Мәскәү клиникасыннан чыгардылар.

«175нче гимназиядә зыян күргән 2007 елгы кызны Федераль клиникадан чыгардылар. Бүген аны Мәскәүдән Казанга кайтардылар», — диделәр «Татар-информ» агентлыгына Татарстан Сәламәтлек саклау министрлыгы матбугат хезмәтендә.

Табиблар хәзер баланың хәлен канәгатьләнерлек дип бәяли.

Хәзер федераль клиникада Казан мәктәбенә һөҗүм вактытында зыян күргән дүрт бала һәм өч олы кеше кала.

Моннан тыш, Балалар республика клиник хастаханәсендә өч пациент дәвалануын дәвам итә. Аларның хәле тотрыклы.

«Татар-информ» агенлыгы хәбәр иткәнчә, Татарстан сәламәтлек саклау министры Марат Садыйков һәм республикада кеше хокуклары буенча Тулы вәкаләтле вәкил Сәрия Сабурская Балалар республика клиник хастаханәсендә 175нче мәктәптә имгәнгән балаларның хәлен белде.

 https://tatar-inform.tatar/news/health/02-06-2021/kazan-m-kt-bend-atyshta-img-ng-n-kyzny-m-sk-klinikasynnan-chygardylar-5825508