Арск-Информ
  • Рус Тат
  • “Казан утлары” журналы редакциясе һәм “Татмедиа” җәмгыяте белән берлектә бастырылган тагын бер китап дөнья күрде

    “Татмедиа” акционерлык җәмгыяте бинасында танылган язучы, тәнкыйтьче Ринат Мөхәммәдиевнең “Казан утлары” журналы редакциясе һәм “Татмедиа” җәмгыяте белән берлектә бастырып чыгарылган “Кыргый атауга сәяхәт” китабын тәкъдим итү чарасы үтте. Зал тутырып килгән язучылар, китап сөючеләргә карап, Ринат абыйның иҗаты халык тарафыннан югары бәяләнүен аңлыйсың.

    Чынлап та, аның “Сират күпере”, “Ак кыялар турында хыяллар”, “Кенәри – читлек кошы” һәм башка әсәрләрен укучылар бик яратып кабул иткән иде. Монысы да күңел түренә кереп урнашачагына шик юк. “Кыргый атауга сәяхәт” китабы – әлеге сериядәге китапларның унөченчесе.

    – Мондый форматтагы китаплар чыгару киң җәмәгатьчелектә зур кызыксыну уятты. “Казан утлары” сериясе “Татмедиа” акционерлык җәмгыятенең зур ярдәме белән барлыкка килде. Ә Ринат Мөхәммәдиевнең үзенә килсәк, ул зур бүләкләр лауреаты булу белән бергә, 70-80 елларда татар прозасында үзгә бер эз салган һәм тулы бер юнәлешен булдырган әдипләрнең берсе, – диде әдәбият галиме, тәнкыйтьче Әлфәт Закирҗанов.

    Ринат абый әлеге проект кысаларында үзенең дә китабы чыгуына бик сөенүен җиткерде, “Казан утлары” журналы хезмәткәрләре үз теләкләре белән шундый мөмкинлек тудыруларына рәхмәт әйтте.

    Реклама

    – “Казан утлары” журналы сериясеннән унөченче китапның чыгуы “татар китап укымый”, “татарның укырлык әсәрләре юк”, “татарның укырлык итеп иҗат итүче язучылары юк”, – дип әйтүче кара авызларга бик яхшы җавап. Күз алдына китерегез: кыска гына вакыт эчендә (ай саен бер китап чыгарып барабыз) шушы сериядәге утыз мең данә китап бастырдык. Шуның 80 проценты инде сатылып беткән! Кайнар сумсалар кебек очалар гына! Кайбер китаплар зур дефицитка әйләнде. Сез аларны инде таба алмыйсыз, чөнки сатуда юк. Бу, әлбәттә, татар милләтенең чын милләт булуын, аның укучы халкы булуын, яза белгән язучылары булуын тасвирлый торган проект. Бу проектның популярлыгы нәрсәдә? Беренчедән, җиңел, кечкенә – кулда тотарга, кесәгә салып йөрергә уңайлы формат. Икенчедән, “Казан утлары” журналы һәм аның баш мөхәррире Рөстәм Галиуллин тарафыннан сайлап ала белү таланты. Шушы китапларның авторлары арасында Ринат абыйның да булуы – безнең өчен зур дәрәҗә, – диде үз чыгышында “Татмедиа” акционерлык җәмгыятенең генераль директоры Шамил Садыйков.

    “Кыргый атауга сәяхәт” китабын Татарстан китап нәшрияты кибетләреннән сатып алырга мөмкин.

    Чыганак: http://shahrikazan.ru/news/yazmalar/shamil-sadyykov-bez-chygargan-kitaplarny-80-protsenty-inde-satylyp-betkn

    Хәзер Арча һәм Арча районы яңалыкларын безнең Telegram-каналдан да белә аласыз

     

    Иң мөһим һәм кызыклы язмаларны Татмедиа Telegram-каналында укыгыз


    Реклама

    Нравится
    Поделиться:
    Реклама
    Комментарии (0)
    Осталось символов: