Сәгыйдәбану әби вафат булды

Күпне күргән әби ул. Бөек Ватан сугышы башланганда аңа 17 яшь кенә була. Аны Свердлов өлкәсенә торф чыгарырга җибәрәләр, аннан окоп казырга. Анда күргәннәрен сөйләгәндә йөрәк кысылып куя, ничек түзгән адәм баласы... 1942 елдан тракторда эшли.

Авылдашлары алар турында бик җылы итеп сөйлиләр. Ире Габделхәй дә әйбәт кеше була. Бик матур гомер итәләр,  кызганыч, балалары гына булмый. Иренең әти-әнисен, авыру сеңлесен үзләренә сыендыралар. Сәгыйдәбану үзенең сукыр әнисен дә тәрбияли. 17 ел авыру ирен карый, 87 яшендә соңгы юлга озата.

Сәгыйдәбану әби гомере буе кешеләр турында кайгыртып яши. Озак еллар авылның абыстае була, күз тиеп авыручыларны дәвалый.

Урының җәннәттә булсын, Сәгыйдәбану әби!

Фотода: әле ел башында гына әбекәйне туган көне белән котларга Арча муниципаль район башлыгы Илшат Нуриев килгән иде...