Татарстан Республикасы һәм Россиянең халык артисты Равил Шәрәфиев: «Артист мәңге яшь була алмый. Əмма театр гел яшь булырга тиеш»

Камал театрының яңа бинасын ачу тантанасы «Туган тел» җыры һәм Татарстанның халык артисты Илдус Əхмәтҗанов башкаруында Тукайның «Театр» шигыре белән башланып китте.

«Үзеңне ювелир бизәнү әйбере эчендә кебек хис итәсең», - дип соклану сүзләреннән башлады чыгышын Россия мәдәният министры Ольга Любимова.

«Бу театр ачылу тантанасы бөтен Россия өчен зур вакыйга», – диде Россия Театр әһелләре берлеге рәисе Владимир Машков. Котлау сүзләре белән шулай ук Россия Төзелеш һәм торак-коммуналь хуҗалыгы министры Ирек Фәйзуллин чыгыш ясады.

«Безнең иҗади потенциалыбыз бар. Без үз эшебезне башкардык. Хәзер инде сез безне сокландырыгыз», - диде Татарстан Республикасы Рәисе Рөстәм Миңнеханов труппага карап.

Татарстан Республикасы һәм Россиянең халык артисты Равил Шәрәфиев символик ачкычны яшь буын вәкиленә тапшырды. «Артист мәңге яшь була алмый. Əмма театр гел яшь булырга тиеш», – диде ул.

Ачылу тантанасы Татарстан Республикасы Мәдәният министрлыгының йомгаклау коллегиясе утырышы белән дәвам итә.

Чыганак: Татар-информ