Яңалыклар
Татарстанда яшь гаиләләрне торак белән тәэмин итүне финанслау күләме артты
Татарстанда 2023-2025 елларга «Яшь гаиләләрне торак белән тәэмин итү» программасын республика бюджетыннан финанслау күләме артты. Бу хакта Татарстанның яшьләр эшләре министры Тимур Сөләйманов сөйләде.
2023 елда Татарстанның 39 муниципаль берәмлегеннән барлыгы 78 яшь гаилә торакның норматив бәясеннән 35 процент күләмендә субсидия алачак.
Министр сүзләренә караганда, Яшьләр эшләре министрлыгы барлыгы дүрт программа гамәлгә ашыра, алар ярдәмендә 2022 елда Татарстанда яшәүче 1092 гаилә торак шартларын яхшырткан.
Аерым алганда, «Яшь гаиләләрне торак белән тәэмин итү» ярдәмче программасы буенча 2022 елда республикада 50 гаилә торак шартларын яхшырткан, ә 2006 елдан 2021 елга кадәр җәмгысе 8041 гаилә тораклы булган.
Моннан тыш, «Торак шартларын яхшыртуда яшь гаиләләргә дәүләт ярдәме турында»гы Татарстан законы нигезендә яшь гаиләләргә торак бәясеннән 60 процентка кадәр күләмен 15 елга процентсыз кичектереп түләү мөмкинлеге бирелә. 2022 елда бу мөмкинлектән 32 гаилә, ә 1999-2022 еллар аралыгында барлыгы 4393 гаилә файдаланган.
«Яшь гаилә» социаль ипотека программасы буенча Татарстанда яшәүче 1010 гаилә Татарстан Дәүләт торак фондыннан ташламалы шартларда торак алган.
Моннан тыш, 2022 елда 49 кеше «Студентлар лигасы» социаль ипотека конкурсында җиңгән. 2012 елдан башлап әлеге программа кысасында 343 татарстанлы торакка ия булган.
Следите за самым важным и интересным в Telegram-каналеТатмедиа
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев