Слайдер

Бүген Арча районының Яңа Кырлай авылында "Ат көне" узды.

12 сентябрьдә Арча Үзәк балалар китапханәсендә эшләүче Гөлназ Рамил кызы Шакирҗанова "Татар кызы-2019" республика конкурсында катнашып, "Иң зирәк кыз" номинациясендә җиңүче булды. Афәрин, Гөлназ!

11 сентябрь — көзнең матур, сихри төсләргә бай вакыты. Шул көнне Мөхәммәт Мәһдиевнең кызы Гәүһәр дөньяга килә һәм туган көнендә ул “Әтием эзләреннән...” исеме астында оештырылган әдәби автомарафонда катнашу өчен туган ягына кайтты. Бу көнне “Казан арты” музееның “Әдәбият һәм сәнгать” бүлегендә аңа багышланган күргәзмә эшләде, Арча үзәгендәге язучылар аллеясында Мөхәммәт Мәһдиевнең рухына чәчәкләр салынды, якты хатирәләр белән уртаклашылды. Гәүһәр Хәсәнова, Мөхәммәт Мәһдиевнең апасының кызы Җәүһәр Галимова, язучы Вакыйф Нуриев, журналист Риман Гыйлемханов, Арча районының администрация, мәдәният бүлеге, музей хезмәткәрләре катнашкан автомарафында тукталышлар түбәндәге маршрутларда булды: музей-Арча үзәге-Казанбаш-Үрнәктәге көллият-Үрнәкнең Сосновка өлеше- урман юлы-Сеҗе-Сикертән-Гөберчәк зираты-Гөберчәк. Сәяхәттән һәркем рухи көч туплап китте.

Акция кысаларында Арчаның 1 нче мәктәбендә укучы балалар белән бергә шәһәр буйлап экскурсия оештырылды. Аларны укытучылар, ЮХИДИнең “Юл хәрәкәте куркынычсызылыгы” җитәкчесе Энҗе Мөхәммәтҗанова, инспекторлар Фәнил Муллагалиев, Алмаз Зарипов озатып йөрде.

Сәнгать мәктәбендә Татарстанның халык рәссамы Михаил Кузнецов осталык дөресләре үткәрде

Арчаның “Ястребы” хоккей командасы яңадан-яңа уңышлары белән шатландырып килә. 8 сентябрь көнне команда Новочебоксарск шәһәрендә узган “Россия хоккей лигасында дусларча очрашу” чемпионаты кубогына сайлап алу этабында катнашып, җиңүче һәм Мәскәүдә узачак финал ярышларына юлламага ия булды. Уңышлар юлдаш булсын үзләренә!

Уку елы башлануга, Ашытбаш мәктәбе базасындагы шашка-шахмат дөньясы да үз ишекләрен ачты. Биредә берьюлы шахмат уйнау сеансы узды. Балаларның белемен күтәрү максатыннан, уку-укыту методик чарасы буларак оештырылган уеннарга Арча гына түгел, Кукмара, Әтнә, Балтач, Саба районнарыннан да килгәннәр. Ашытбаш ярышларының данын күрше-тирә район укучылары яхшы белә, шунлыктан, ярышларга килергә ашкынып тора алар. Биредә узган һәр ярышта Татарстан призчылары катнашуы инде традициягә әйләнде. Наил Сабирҗанов һәм Сөләйман Галиуллин һәрвакыттагыча, ярышны югары дәрәҗәдә оештыруда күп көч куйган. Планнарында, ноябрь аенда Ашытбаш мәктәбе базасында тагын республика күләм ярыш уздыру тора.

Һөнәр сайлау җиңел түгел. Бу хакта кеше балачагыннан ук хыяллана башлый. Хәзерге заманда киләчәк буынның һөнәр сайлавына, хезмәт эшчәнлеген формалаштыруга зур игътибар бирелә. Шул уңайдан, мәктәпкәчә яшьтәге балаларда яхшылык, патриотлык сыйфатлары тәрбияләү белән беррәттән, өлкәннәрнең һөнәри эшчәнлеге турында аңлату, хезмәт тәрбиясе дә мөһим булып тора. “Казан арты” музее хезмәткәрләре әлеге теманы юлдаш итеп алып, Арчаның 1 нче балалар бакчасында кунакта булды. Балалар белән уздырылган сөйләшүдә алар “Мин эшче булыр идем...”, Нәрсә ул һөнәр?”, “Синең әти-әниең кем булып эшли”, “Миңа нинди һөнәрләр ошый” темаларына тирәнрәк тукталды, һөнәр турында балаларга әйтем, мәкальләр җиткерде. Балалар зур кызыксыну белән үзләрен чәчтараш, пешекче, табиб, төзүче һөнәрләрендә сынап карады һәм иң мөһиме, барлык һөнәрләрнең дә кирәкле, кеше хезмәтне яратырга тиеш икәнлекне аңладылар.

Без Яңа Кенәрнең “Мәрхәмәтлек” тернәкләндерү үзәгендә ял иттек. Арчадан “Яшь йөрәкләр” ансамбле килеп, безне ял иттереп, күңелләребезне күтәреп, концерт куеп китте. “Яшь йөрәкләр” халык вокаль ансамбле инде 12 елдан бирле эшләп килә. Анда, олы яшьтә булсалар да, сәнгатьне яраткан, җырга, моңга гашыйк хатын-кызларыбыз йөри. Ансамбльне оештырган Нәсимә Гарифуллина бөтен гомерен сәнгатькә багышлаган, үз эшен төгәл, җиренә җиткереп башкаручы мәдәният хезмәткәре. Ансамбльдә җарлауның нечкәлекләренә өйрәтүче музыка белгече Гүзәл Минхәерова ансамбльнең уңышларга ирешүендә күп көчен куйган. Гармунчы Вилорик Зыятдинов та гармунда, төрле уен коралларында уйный, аерым җырчыларны җырларга өйрәтә. “Яшь йөрәкләр” халык вокаль ансамбленә мактаулы исемнәр алуда үзләренең көчләрен куйган ансамбль җитәкчеләренә зур рәхмәтебезне белдерәбез. Безне, үзәктә ял итүчеләрне хөрмәтләп, ерак араларны якын итеп, монда килеп күңелле ял иттергәннәре өчен олы рәхмәтебезне әйтәбез. Үзәктә Теләче, Арча, Саба, Әтнә районнарыннан килеп ял итүчеләргә аларның чыгышы бик ошады. Барлык тамашачылар исеменнән:Венера Җиһаншина, Әтнә районы, Кышлау авылы.

Татар әдәбиятының матур үрнәкләрен русча укучыларга җиткерү - әдәбиятыбызның мөһим бурычларыннан берсе. Бик күп вакыт, төгәллекне, татар һәм рус телләрен тирәнтен белүне таләп иткән хезмәтне якташыбыз Гәүһәр Хәсәнова яратып башкара, бүгенге талантлы татар язучыларының әсәрләрен рус теленә тәрҗемә итүне бик теләп дәвам итә. Гәүһәр Хәсәнова әтисе Мөхәммәт Мәһдиевнең туган авылы Гөберчәк халкы, бабасы Гомәр Бәширов төзеткән Яңа Сала мәктәбе коллективы, үзенең туган авылы Казанбаш белән даими элемтәдә тора. Ул район күләмендә оештырылган очрашуларда теләп катнаша, мәктәпләрдә укучылар алдында чыгышлар ясый. Бу көннәрдә якташыбыз Гәүһәр Хәсәнова –Мәһдиева үзенең олы юбилеен билгеләп үтә. Без аны ихлас күңелдән юбилее белән котлыйбыз, ныклы сәламәтлек, иҗат уңышлары телибез.

Участок сайлау комиссияләре әгъзалары бюллетеньнәрне санауга кереште. Район сайлау комиссиясеннән алынган мәгълүматларга караганда, район сайлаучыларының 94%тан артыгы тавыш бирүдә катнашты.

Арчада сайлау участокларына сайлаучы халык актив рәвештә килә. Көн үзәгенә инде сайлаучыларның яртысыннан артыгы үз тавышын бирергә өлгергән.

Арча районы башлыгы Илшат Нуриев Апаз авылында урнашкан сайлау участогында үз тавышын бирде

Арча шәһәрендә яшәүче Сабиров Наил Закир улы ярты гасырга якын колхоз рәисе булып эшләгән легендар шәхес. Ул 1985-1990 елларда Татарстан Югары Советы утырышы, табигатьне саклау буенча даими комиссия рәисе. — Югары Совет депутатлары арасында колхоз рәисләре шактый булган, ә менә даими комиссия рәисе булганы мин генә, — ди Наил Закирович. — Татарстаныбыз яулаган уңышларга куанам. Тавышымны мин иң лаеклы дип санаганнарга бирдем.

Бүген Татарстанның 41 районында Җирле органнарга депутатлар сайланачак. Бердәм сайлау көнендә Татарстанда 2811 сайлау участогы эшли.