Арча районы туризм өлкәсендә яңа адымнар ясый

Арча районында туристик потенциалны бәяләү һәм яңа маршрутлар булдыру юнәлешендә эш дәвам итә. Районга билгеле гид-экскурсовод Гөлнара Габдрахманова килде. Чара Арча муниципаль районы башкарма комитеты тарафыннан оештырылды.

Кунакларны башкарма комитет җитәкчесе урынбасары Регина  Филиппова каршы алды. Аның җитәкчелегендә делегация өчен танышу программасы әзерләнде.

Сәфәр барышында кунаклар «Казан арты» тарих музеенда, Югары Курса авылындагы Габденнасыйр Курсави музеенда һәм Арча үзәк мәчетендә булдылар. Шулай ук шәһәр парклары һәм ял итү урыннары каралды. Бу объектларның туристлар кабул итүгә әзерлеге тикшерелде.

Очрашу кысаларында комплекслы туристик проект булдыру мәсьәләләре каралды. Яңа маршрутлар, экскурсия программалары һәм инфраструктура үсеше турында фикер алышу узды.

Гөлнара Габдрахманова: «Арча районы — татар халкының рухи үзәге. Биредә бай тарих, үзенчәлекле мәчет архитектурасы сакланган. Туристлар өчен эчтәлекле ял мөмкинлекләре бар», — дип билгеләп үтте.

Әлеге проектны гамәлгә ашыру районның туристик җәлеп итүчәнлеген арттыруга юнәлтелә. Бу эшләр яңа мөмкинлекләр тудырыр дип көтелә.