Кош гриппы: Арча районында яшәүчеләргә нәрсә белергә кирәк

Арча районында ветеринария хезмәткәрләре кош гриппы таралу куркынычы турында халыкка аңлату эшләре алып бара. Бу йогышлы авыру, нигездә, йорт һәм кыргый кошлар арасында тарала, әмма аерым очракларда кешеләр өчен дә куркыныч тудырырга мөмкин.

Район ветеринария берләшмәсе вәкилләре хәбәр иткәнчә, кош гриппы вирусы тиз таралу сәләтенә ия. Аеруча күчмә кыргый кошлар инфекцияне ерак араларга күчерә ала. Шуңа күрә шәхси хуҗалыкларда саклык чараларын үтәү аеруча әһәмиятле.

Авыру төрле юллар белән йога: чирле кошлар белән туры контакт аша, пычранган су һәм азык аша, шулай ук һава-тамчы юлы белән. Белгечләр кошлардагы төп билгеләрне дә атый: кинәт үлү, йомырка салу кимү, сулыш алу авырлашу, хәлсезлек.

«Кошларны кыргый кошлар белән контакттан саклау, чисталыкны тәэмин итү һәм вакытында ветеринарларга мөрәҗәгать итү — иң нәтиҗәле профилактика чаралары», — дип билгеләделәр район ветеринария берләшмәсендә. .

Шәхси хуҗалыкларда кошларны ябулы урыннарда тоту, чит кешеләрне кертмәү, яңа кошларны аерым карантинда тоту киңәш ителә. Шулай ук үлгән кошларны  махсус тәртиптә юк итәргә кирәк.

Белгечләр искәртә: үлгән кыргый кош тапкан очракта, аңа кагылмаска һәм бу хакта ветеринарларга хәбәр итәргә кирәк.

Арча районында яшәүчеләр кош гриппы буенча сораулар белән район ветеринария берләшмәсенә мөрәҗәгать итә ала. Белгечләр һәрвакыт консультация бирергә әзер.