Ачык шугалакта спорт бәйрәме узды

"Папа, мама, я - ледовая семья" дип аталган чарада барлыгы сигез гаилә катнашты. Спорт бәйрәмен оештыручы Арча боз сарае җитәкчесе Илһам Шакиров сүзләренчә, мондый ярышларны уздыру инде күптәнге хыял булган. "Быел беренче тапкыр оештырылганлыктан, бәйрәмнең катнашучылары үзебездә хоккей белән шөгыльләнүче укучылар һәм аларның әти-әниләре булды. Тик әлеге бәйрәмне традициягә әйләндереп, районыбыз халкын күбрәк җәлеп итәсе килә. Бу уеннарның максаты - гаилә белән саф һавада вакытны файдалы һәм күңелле итеп уздыру", - диде ул.

Спорт бәйрәмендә ярышлар милли уен йолалары белән үрелеп барды. Мәсәлән, тимераяк кигән килеш кашыкка йомырка куеп чабу уены сабантуе мизгелләрен хәтерләтте. Уеннар барысы да ачык һавада боз өстендә узды. 

Бирегә җыелган спорт сөючеләрне 30 градуска якын суык та куркытмады. Ә туңганнар өчен җылы коймак белән кайнар чәй әзер иде. 

Катнашучылар төрле сынаулар аша узып, билгеле бер дистанцияне вакытка узды. Шулай ук тизлеккә һәр гаиләдән бер бала тимераякта ярышты.

Барлык ярышлардан соң, Арчадан Сабитовлар гаиләсе беренче урынга лаек булды. Барлык катнашучыларга баллы күчтәнәчләр, җиңүчеләргә медальләр тапшырылды.

Тулырак газетабызның 13 гыйнвар саныннан укый алачаксыз.