Алар 50 ел бергә

Гаилә, мәхәббәт һәм тугрылык көнендә алар ЗАГСның Дан китабына кул куйды һәм истәлек бүләгенә булды.

Кайбычта туып үскән Хәбир абый яшьли ятим кала. Язмыш җилләре аны Свердловск өлкәсендә Саба районы кызы Нурания апа белән кавыштыра. Яшьләр ул елларда бәхет эзләп авылдан читкә киткән була. Икесе дә гомерләрен заводта эшләүгә багышлый: Хәбир абыйның стажы 50 ел булса, Нурания апа да калышмый — 40 ел заводта бил бөгә. Тик Аллаһы Тәгалә аларга уртак балаларын сөю бәхетен бирмәгән. Якын итеп, өзелеп торган туганнары булганга, 9 ел элек Арчага кайтып урнашырга уйлаганнар.

“Яшьләр бер-берен аңлап, санлап, безнең кебек бәхетле, тигез гомер кичерсеннәр”, — ди Абкалеевлар.