Арчада «Ел хатын-кызы» республика бәйгесенең зона этабы узды

Быел бу бәйгенең зона этабы Арча районында оештырылды. Районыбыз мәдәният йортына Саба, Теләче, Кукмара, Әтнә, Балтач, Биектау, Балык Бистәсе, Лаеш, Питрәч районнарыннан катнашучылар җыелды. 

"Ел хатын-кызы. Ел ир-аты: хатын-кыз карашы" бәйгесе Татарстан Республикасы рәисе ярдәме белән уздырыла һәм менә инде өч дистә елга якын хезмәт юлы, язмышы, уңышлары белән үрнәк булырлык гүзәл затларны республикабызга таныта. 

Конкурсның жюри рәисе, «Татарстан хатын-кызлары» региональ иҗтимагый оешмасы советы әгъзасы, Россия Пенсионерлар берлегенең Татарстан Республикасы буенча төбәк бүлеге рәисе урынбасары Гүзәлия Минкина бу бәйгенең әһәмияте зур булуына басым ясады. Аның быелгысы Россиядә игълан ителгән Гаилә елына багышлана. 

Бәйгедә катнашучылар берничә номинациядә чыгыш ясады. Арча районы "Һөнәрем - язмышым" һәм "Эшмәкәр хатын-кыз" номинацияләрендә тәкъдим ителде. Ташкичү хуҗалыгында хезмәт куючы районыбызның бердән-бер комбайнчысы Рәмзия Хәбибуллина да, МХО зонасындагы егетләребезгә ярдәм җыю эшендә зур эш башкаручы Алсу Нуриәхмәтова да җиңү яуладылар. 

Бәйге турында тулырак газетабызның 9 февраль саныннан укый алачаксыз