Арчада район башлыгы һәм аның урынбасары сайланды

Аны район Советына сайланучылар арасында иң өлкән депутат буларак Шәйдулла Сәлахов ачты. 

Район территория сайлау комиссиясе рәисе Булат Кадыйров депутатларны 11-13 сентябрьдә узган сайлау нәтиҗәләре белән таныштырды. 

20-22 сентябрьләрдә районның барлык 16 авыл җирлекләрендә,бүген иртә белән шәһәр муниципаль берәмлегендә дә Советларның беренче оештыру утырышлары узды. Аларда җирлек башлыклары (алар район Советы депутатлары да була)  һәм һәр җирлектән тагын берәр район Советы депутаты сайланды. 

Шулай итеп, дүртенче чакырылыш район Советында 34 депутат . Бүгенге утырышта алар үз арасыннан район башлыгы һәм аның урынбасарын сайладылар.

Утырышта катнашкан Татарстан мәдәният министры вазифаларын башкаручы Ирада Әюпова соңгы елларда Арча районында социаль-икътисади үсеш мәсьәләләренең уңышлы хәл ителүен билгеләп үтте һәм ТР Президентының район башлыгы итеп Илшат Нуриевны сайларга дигән тәкъдимен җиткерде. 

Яшерен тавыш бирү юлы белән Илшат Габделфәрт улы Нуриев бертавыштан Арча муниципаль район башлыгы итеп сайланды.

Ул республика Президенты Рөстәм Нургалиевич Миңнехановка һәм депутатларга зур ышаныч белдергәннәре өчен рәхмәтен җиткерде, район халкы мәнфәгатьләрен яклап эш итәчәген белдереп ант итте.

Аның урынбасары вазифасына моңарчы район Советының юридик бүлеген җитәкләгән Алсу Фирдәүс кызы Мөхәмәтова сайланды.

Моннан тыш депутатлар вәкаләт вакыты чыккан район башкарма комитеты җитәкчесе вазифасына конкурс игълан итү, районның хисап палатасы җитәкчесен билгеләү турында да карарлар кабул иттеләр . Хисап палалатасы җитәкчесе итеп яңадан Надия Равил кызы Сафиуллина билгеләнде.