Авылның бизәлгән йортлары

Гөберчәктә яна утлар!

Һәр авыл кешесе яңа елны көтеп ала. Чөнки яңа елда авыл икенче төрле мохиттә яши. Нинди дисезме? Аллы-гөлле, җем-җем килеп торган төсләргә күмелеп. Мин яңа елда авылыбызның һәр йортын күзәтеп чыктым. Нинди генә төсле утлар белән бизәлмәгән алар. Шундый матур! Матурлыкны күргәч, күңел сөенә, шатлык хисе арта. Бизәлгән бер йорт каршында ирем белән туктап озак карап тордык. Йорт кечкенә генә. Ләкин тирәлегенең бизәлеше – гаҗәеп! Агачлар да, өй дә, капка-койма да төрле төстәге утлар белән бизәлгән. Койма өстендә кечкенә чыршы тора, аңа да утлар куйганнар. Бу йортның элеккеге хуҗалары, дөресрәге, шунда үскән балаларның берсе - бүгенге көндә Түбән Кама районында яши – Гөлнур Мәҗитова. Матурлыкны видеога төшереп аңа да юлладым: “Нигезегез ел саен матур утлар белән бизәлә”, - дип язуыма, ул җавап бирде: “Әти-әниләр, әби-бабайлар, энем Тәбрис, улы Габдулла сөенеп ятсыннар. Рәдисәгә, аның балаларына бик зур рәхмәт!” Бизәлгән йортның бүгенге хуҗасын аңлагансыздыр, ул – Рәдисә Могыйнова, күп балалы ана.

Халидә Габидуллина,

М.Мәһдиев музее җитәкчесе.