“Авыр вакытта ташламавыгыз өчен рәхмәт!“

Халык күп килгән иде, соңгы вакытта әлеге хуҗалык билгесезлек алдында яшәде. Фермалар буш, күпме кеше эшсез калды. Әмма иң тугрылыклылар читкә китмәде. Җитәкче аларга рәхмәт әйтеп, акчалы конвертлар тапшырды.

Иң зур бүләк 58 ел чылбырлы трактор эшләгән Зәкәрия Динмөхәммәтовка эләкте. Шәйдулла Сәләхов аңа үзе эшләгән тракторны бүләк итте, документларын тапшырды. “Көчем барында эшлим әле!“ – диде бүләк алучы.

Тракторы кичтән көйсезләнсә дә, хатыны Наилә белән төнлә төзәтеп куялар иде. Зәкәрия тракторын ничек кадерләсә, Наилә ханым ирен шулай кадерләп яшиләр.

Озакламый хуҗалыкка 1200 тана кайтачак. Эшләр уңайга китәргә тиеш.

Җыелышта район авыл хуҗалыгы һәм азык-төлек идарәсе җитәкчесе Ленар Абдуллин катнашты.