Илдә тынычлык булсын.
Арча спорткомплексында урнашкан 943нче сайлау участогы нәкъ 8 тулуга ишекләрен ачты. Керүгә сайлаучыларның температурасын үлчиләр, аңа битлек, пирчәткә бирәләр һәм кулларын антисептик белән эшкәртәләр. Комиссия әгъзалары саклану чарасы буларак махсус халатлар кигәннәр.
- 11-12 сентябрьдә безнең участокта сайлаучыларның 70 процентка якыны килде инде. Аеруча җомга көнне кеше күп булды. Ял көннәренә калдырасылары килмәде, күрәсең, - диде комиссия рәисе Венера Таджибаева.
Беренче булып сайларга Наил Галиәхмәтов килде. Ул "Водоканал-Сервис" ширкәтендә механик булып эшли. Беренче сайлаучы буларак, аңа истәлек бүләге тапшырылды.
- Тормышларыбыз матур, зарланыр урыныбыз юк. Киләчәктә дә стабильлек һәм иң мөһиме тынычлык булсын, - диде Наил Нәкыйпович.
Хәзер Арча һәм Арча районы яңалыкларын безнең МАКС каналыннан да белә аласыз
Нет комментариев