Бу аналар балаларының иң төпле терәге

   Китапханәбездә “Изге эшләр эстафетасы” кысаларында «Дөньяда матурлыкка һәм яхшылыкка урын бар» дигән әдәби- музыкаль чара узды.Кичәгә иң сабыр, иң шәфкатьле, иң миһербанлы, авырлыклар алдында бирешмәүче,көчле рухлы  райондашларыбыз-сәламәтлек мөмкинлекләре чикле балалар тәрбияләүче әниләр чакырылды. Кичәне үткәрүнең максаты сәламәтлекләре чикле балаларны тәрбияләүче әниләрнең күңелләрен ял иттереп  бәйрәм бүләк итү иде. Чара уртак проблемалар белән янып яшәгән әниләргә рәхәтләнеп аралашырга, киңәшләшергә, тормыш мәшәкатьләреннән беразга гына булса да арынып торырга яхшы булды.Очрашу җылы шартларда узды.Әниләрнең йөзләреннән нур бөркелү, елмаю күрү кебек җылы хисләр тою без чараны оештыручыларны да бәхетле итте. 
    Кичәнең программасы әдәби укуларны, музыкаль чыгышларны, иҗади остаханәләрне, спикерлар белән мавыктыргыч әңгәмәләрне үз эченә алды. Чакырылган кунаклар өчен  китапханә хезмәткәре  мастер-класс уздырып,бизәнү әйбере ясатты.Кичәдә Укучылар сараенда тәрбияләнүче З.Зиннәтова җитәкчелегендәге “Зиннәт” төркеме  балалары башкаруында җырлар, китапханәчеләр тарафыннан шигырьләр яңгырады. Кичәнең «Үзеңне ярат» дигән өлешендә практик психолог Латыйпова Эльвира Рафаиль кызы эмоциональ сәламәтлекне саклау өчен медитациянең кайбер методикаларын күрсәтте, уңай эмоциональ халәт булдыру максатыннан психологик тренинг уздырды. Әниләргә үз- үзен яратырга ,үзбәя бирергә өйрәтерлек истәлек открыткалар таратты.  Китапханәче бай китап күргәзмәсенә күзәтү ясап, авырлыкларны җиңәргә ярдәм итәргә җавап табарлык китаплар җыелмасын тәкъдим итте. Шулай ук кунакларга үз- үзеңне тышкы яктан карау, киемгә  матурлык өстәү максатыннан, яулыклар, шарфлар бәйләүләрнең төрле төрләре күрсәтелде. Әниләр үзләре дә өйрәнгәннәрне бик теләп кабатладылар.  Кичәнең йомгаклау өлешендә 6 нчы мәктәпнең 11 нче сыйныф укучылары тарафыннан әзерләнгән презент сыйфатында кунакларга видеокотлау тәкъдим ителде.
    Уздырылган әдәби- музыкаль  кичә хатын- кыз- Ана исемен йөртүче олы затка үзе турында да кайгыртырга кирәклекне аңларга, искә төшерергә мөмкинлек бирде. Без бу чарага кунак итеп чакырылган   гүзәл затларның һәрберсе зур ихтирамга лаек булуын аңладык. Һәр әнинең үз тарихы, үз язмышы, ләкин алар авырлыкларга зарланмый. Иң мөһиме – сабыйлары исән-сау булсын, дигән теләк белән яшиләр. Бу аналар балаларының иң төп ныклы терәк-таянычы, шулай ук  түземлелек үрнәге дә! Бала нинди генә булса да синең  бәгырь җимешең, аны ничек бар шулай бары тик әнисе генә кабул итә, ярата ала. Әгәр дә син тормышны яратасың икән,синең тормышта кешеләрчә яшисең килә икән, һич вакытта да төшенкелеккә бирелергә ярамавын бу ханымнар бик яхшы аңлый.
   Җырларда җырланганча, шигырьләрдә сөйләнгәнчә, китаплардан укыганча һәм үз күзләрем  белән күргәнчә, тормыш юлы бакча юлы түгел.Тормыш юлында чокыры да, тавы да була.  Язмышлар да шундый.... Тик тормышта  нинди генә хәлгә юлыксаң да, нык булырга, төшенкелеккә бирешмәскә, шатланып яшәргә кирәклекне һәркем онытмасын! Тормышның ямен, матурлыгын белеп яшәгәндә генә яшәү рәхәт тә, куанычлы да була.

    Бүгенге чарада катнашучы  олы йөрәкле аналар  “үзенчәлекле” бала тәрбияләүче аналарны игътибардан читтә калдырмаганнары өчен  китапханә хезмәткәрләренә чиксез рәхмәтләрен әйтеп, мондый аралашулар ешрак булса иде дигән теләкләрен җиткерделәр.

 Абдуллина Дилә Вансит кызы китапханәнең                                Халыкка хезмәт күрсәтү бүлеге китапханәчесе