Бу сыерчык оялары Вәкил абый Сөнгатов эше булып чыкты

10 апрель көнне без сайтка болай дип яздык: "Арча станциясендәге Көньяк урамы тыкрыгында кибет янындагы каеннардагы сыерчык ояларына күз төште. Үтеп барышлый. Ул сыерчык ояларын кемнәр куйды икән? Бәлки безгә әйтерсез. Беләсе иде. Игелеле эш. Тирәбездә яши мәрхәмәтле кешеләр".

Хөрмәтле сайтны укучылар, рәхмәт, бу язмага битараф калмадыгыз. "Шул урамда яшәүче Сөнгатов Вәкил абый!" -- дигән хәбәр килеп иреште безгә.

Эзләп таптык без Вәкил абыйны. Дөрестән дә, сыерчык ояларын ясаучы ул булып чыкты. 

-- Шул тирәдә генә яшим мин, -- дип сөйләде Вәкил абый. -- Пенсиядә. Улым гаиләсе белән яшибез. Каеннар үсә торган урында чүплек иде анда. Чистарттык. агачлар утырттык. Алмагачлар да бар әле анда. Сыерчык ояларын да ел да карап, чистартып торабыз. Алар күмәкләшеп сайраша башласа, үзе бер күңелле! Табигать белән дус булырга кирәк. Үзебез өчен ич.