Буада кош гриппы ачыкланган

Кошлары үлә башлагач, анализ аларда кош гриппы булуын күрсәткән. Ачыкланганча,  хуҗа 27 сентябрьдә Чуашстанның Батыр районы Татар Согыты авылыннан шәхси эшмәкәрдән үрдәкләр сатып алган. Бүген районда әлеге мәсьәләгә багышланган гадәттән тыш хәлләр комиссиясенең чираттан тыш утырышы узды. Авыруны тиз арада йөгәнләү максатында фермер хуҗалыгында асралган кош-кортларны тиз арада  юк итәргә  кушылды.

“Россельхознадзор”ның Татарстан Республикасы буенча идарәсенең дәүләт ветеринария күзәтчелеге бүлеге начальнигы Идрис Гатин әйтүенчә, фермер хуҗалыгында асралучы барлык кош-корт юк ителәчәк.

Районда Чуашстан республикасыннан кош-корт һәм азык сатып алучылар,  үз хуҗалыкларында кош-корт  үлеме күзтелгән очракта  кичекмәстән Буа шәһәре, Ленин урамы, 52 йорт адресы буенча ветеринария берләшмәсенә яисә участок ветеринария табибына мөрәҗәгать итәргә тиешләр. Белгечләр кош вирусының кошлар өчен генә түгел, кеше организмы өчен дә куркыныч булуын искәртәләр. Шуңа күрә авыру булганда  мөмкин кадәр тиз арада хәбәр итәргә кушалар.  

Тулырак: http://buinsk-tat.ru/news/kich-bgen-irtg/buada-kosh-grippy-chuashstan-respublikasynnan-satyp-algan-koshlarygyz-ls-bu-khakta-tiz-arada-khbr-itegez

Бу 1200нән күбрәк каз һәм 120ләп баш үрдәк, дигән сүз. Соңгыларын фермер 27 сентябрь көнне сатып ала. Ветеринария озатуы документлары булмый. Казларны июнь аеннан бирле үстерә. Башта үрдәкләр, аннан казлар авырый башлый. Авыру лаборатор тикшерү нәтиҗәсендә ачыклана. Бүген хуҗалыкта авыруны юк итү, аның таралуына юл куймау максатында чаралар комплексы үткәрелә. Биредә кош-корт кына түгел, ә азык, хуҗалык кирәк-яраклары, агач әйберләр дә юк ителәчәк. Корылмалар дезинфекцияләнәчәк. Фермада киләсе ел дәвамында кош-корт асрау тыела.

Хөрмәтле райондашлар! Ул яклардан килеп арзан бәягә кош-корт сатучыларны очратсагыз, зинһар сатып алмагыз! Сак булыгыз!

 http://buinsk-tat.ru/news/kich-bgen-irtg/buada-kosh-grippy-achyklangan-kaz-rdklr-yandyryldy-foto