Быелгы кубок «Хәсәншәех» командасында

Традицион турнир быел ике этапта узды. 1-2 февральдә үткәнендә 8 команда: "Хәсәншәех ", "Тигры", "Пөшәңгәр", ""Торнадо", "Субаш Аты", "Яңа Кенәр", "Арча" һәм "Северный" командалары катнашкан иде. Алар үзара турнирның икенче этабына чыгу өчен көрәште. 

23 февральдә үз төркемнәрендә 1-2 урын алган "Субаш Аты", "Яңа Кенәр" һәм "Хәсәншәех", "Пөшәңгәр" командалары яңадан очрашты. Ярышларны район башлыгы Илшат Нуриев Ватанны саклаучылар көне белән тәбрикләп уенчыларга һәм тамашачыларга матур теләкләрен җиткереп башлап җибәрде.

Бәйрәм көн булганга чын ир-егетләр уенын карарга җанатарлар да күп килгән. Алар арасында якташыбыз Татарстанның халык артисты Рөстәм Закиров та бар иде.

"Уенчылар арасында танышлар күп. Барысын да бәйрәм белән котлыйм.Җәрәхәтләрсез матур уен күрсәтүләрен телим"-, диде ул.

Быел да финалга "Хәсәншәех" белән "Субаш Аты" командалары чыкты. Хәтерләсәгез,узган елгы уен Субаш атыларның овертаймда җиңүе белән белән беткән иде. Быелгысы да бик киеренк булды. Соңгы периодта да исәп тигез 2:2 иде.Уен бетәргә берничә генә минут кала "Хәсәншәех" командасы 2 җавапсыз алка кертеп җиңү яулады. Шулай итеп быелгы кубок хәсәншәехларда! Афәрин егетләр! Көмеш медальләр Субаш Аты,  бронза - Яңа Кенәр хоккейчыларында.