Татарстан Мәгариф һәм фән министрлыгы укучыларның май бәйрәмнәрендә ничек укулары турында аңлатты.

«Министрлык адресына ата-аналардан май бәйрәмнәрендә балаларның нинди график белән укулары турында күпсанлы мөрәҗәгатьләр килде», диелгән ведомство хәбәрендә.

Республикада биш көнлек уку атнасы режимында укучылар, көллият һәм югары уку йортлары студентлары 30 апрельдән 3 майга кадәр һәм 7-10 майда укымыйлар. Ә алты көнлек уку атнасы белән укучылар 1, 2 майда һәм 8-10 майда ял итә.

«Балалар бакчалары да шул график буенча эшләячәк», - дип ачыклык керттеләр министрлыкта.

Татарстанда яшәүче эш кешеләре 1-3 майда һәм 7-10 майда ял итәчәк.

«Татар-информ» хәбәр иткәнчә, әлегә республика хакимияте өстәмә яллар кертергә планлаштырмый.

Бу хакта тулырак: https://tatar-inform.tatar/news/magarif-ham-fan-ministrlygy-ukucylarnyn-mai-bairamnarenda-nicek-ukulary-turynda-anlatty-5853493