Фермер хуҗалыгыннан 6 млн. сум килгән зыянны түләтүне сорап судка барып җиткәннәр

Авыл җирлекләрендә җыеннар үтә. Аларда 2020 елда башкарылган эшләргә йомгак ясыйлар, борчыган мәсьәләләрне уртага салып сөйләшәләр.

21 гыйнварда Казанбаш  авылында җыен булды. Анда район авыл хуҗалыгы һәм азык-төлек идарәсе җитәкчесе Ренат Гатиятов катнашты.

Үрнәк авыл җирлеге башлыгы Васил Габделхаков үзара салым акчаларының кайларга тотылганлыгы, бюджет үтәлеше һ.б. турында сөйләде. Шушы территориядә эш алып баручы, ширкәтләр вәкилләре, фермерлар, МЧС, урман хуҗалыгы, ветеринария, полиция хезмәткәрләре чыгыш ясады.

Җыелышның икенче өлеше пай җирләре мәсьәләләренә багышланды. Казанбаш, Көтек  авылларында яшәүчеләрнең пай җирләрен “Казанка”, “Ак барс” агрокомплексы” ширкәтләре, Шакирҗанов фермер хуҗалыгы  эшкәртә. Узган ел Көтек халкы 140 гектар пай җирен Шакирҗанов фермер хуҗалыгына бирергә теләгән һәм ул җирләрне фермер хуҗалыгы эшкәртеп, чәчеп, уңышын җыеп алган. “Ак барс” агрокомплексы” ширкәте моны җирләрне законсыз басып алу дип бәяләгән һәм фермер хуҗалыгыннан 6 млн. сум килгән зыянны түләтүне сорап республика Арбитраж судына биргән.