Газетага язылып бүләк отучы Альмира Гатауллина: «Газета-журнал безнең гаилә әгъзасы булып тора»

 “Язылган өчен кар чистарткыч, телевизор һәм башка бүләкләр” акциясенең җиңүчеләре билгеле. Әлеге акциядә быелгы елның беренчы яртыеллыгына "ТАТМЕДИА" акционерлык җәмгыятенең газета һәм журналларына язылучылар катнашты.  

Райондашларыбыз арасында “ТАТМЕДИА” чыгарган матбугат чараларына язылып, ел да бүләк отучылар булып тора. Исегезгә төшерәбез, алдагы елларда Арча районыннан мотоблок, чәйнек, телевизор һәм кар чистарткыч отучы якташлар булды. Быел да безнең бер райондашыбызга бәхет елмайды.

Хатын-кызлар советы рәисе Альмира Гатауллина ипи пешерү җайланмасы (хлебопечь) отты. Аңа бүләкне бүген, 21 февраль көнне "ТАТМЕДИА" ачык акционерлык җәмгыяте генераль директоры Шамил Садыйков тапшырды.

"Газета-журнал безнең гаилә әгъзасы булып тора. Бу безгә кечкенәдән әти-әнидән сеңгән тәртип. Район газетасына ел да язылам һәм сез оештырган әлеге бүләкләр уйнатуда һәрдаим катнашып киләм. Монда килгәч, моннан 20 ел элек кечкенә генә радиоприемник отканым да исемә төште. Үзеңнеке - үзәктә, диләр. Беренче чиратта мин үзебезнең "Арча хәбәрләре" газетасын укыйм. Аллаһның рәхмәте, бүләк оту бәхетенә дә ирештем. Мондый җайланмам юк иде әле. Илләребез тыныч булып, тәмле ипиләр пешереп ашарга насыйп булсын", - дип, рәхмәт сүзләрен җиткерде Альмира Гатауллина.