Гөберчәк авылында нәфис фильм төшерәләр.

12 мартта Гөберчәк авылында, шушы авылда туып-үскән халык язучысы Мөхәммәт Мәһдиевнең “Без – кырык беренче ел балалары” дигән автобиографик повесте буенча нәфис фильмны төшерү башланды.

Булачак нәфис фильмның авторы Әлфирә Мәһдиева. Ул Мөхәммәт Мәһдиевнең абыйсы Рәшит Мәһдиевнең килене, тумышы белән Әтнә районыннан. Картинаның режиссеры Әмир Галиәскәров.

Мөхәммәт Мәһдиев (фильмда ул Ильяс Сафин дип йөртеләчәк) ролендә Габдулла Кариев исемендәге Татар дәүләт яшь тамашачы театры актеры Булат Гатауллин уйный.

12 мартта беренче кадрларны Әлтафинең (Алмаз Муллаянов) әнисе (Фәридә Байморатова) йортында төшерделәр.

13 мартта кино төшерүчеләр Үрнәк бистәсенә бара. Сугыш елларында педучилище шунда булган. Училище директоры ролен ТРның атказанган артисты Ирек Хафизов башкара.