“Игенче“дә кукуруз сугалар

Июль аенда уракка беренче булып керешәләр алар – шепкән шулай иртә өлгерә. Бөртекле-кузаклы культураларны сугып алгач бераз өзеклек булып тора да, аннан бөртеккә кукуруз сугу башлана.

Комбайнчы Хәниф Вильданов төп уракта 23 мең центнердан артык ашлык суктырган булган. Хәзер менә кукуруз суктыра. Комбайны шул ук, ә суктыру җайланмалары башка. Кукуруз бик яхшы үскән, биеклеге өч метрга җиткән, чәкәннәре дә “көчле“.

– Гектардан 57 центнер чамасы чыга, – ди баш агроном Марат Вахитов. –Дымлылыгы  27–28 процент. Билгеле, киптерергә туры килә.

Кукуруз орлыгы терлекләргә катнаш азык ясау өчен тотылачак.

Хуҗалыкта әле 900 гектардан артык мәйданда көнбагыш та бар. Шушы көннәрдә аны суктыруга керешәчәкләр.

Шулай ук бәрәңге алу дәвам итә. Һава торышы бераз уңайсызрак торса да, бәрәңге игү үзен аклый. Әзерләнгән бәрәңгене сатып алып баралар.

Ә менә туфрак эшкәртү өчен шартлар гаять уңай. Район буенча 50234 гектарда (74 процент) эшкәртелде. “Ак барс“ агрокомплексы“, “Казанка“ ширкәтләрендә бу эш төгәлләнде.