Арск-Информ
  • Рус Тат
  • Илгиз Гайнуллин истәлегенә

    Әти соңгы ярышына ашкынып чыгып китте

    “Арча” спорт комплексында бадминтон буенча ярыш булды. Ул вакытсыз арабыздан киткән Илгиз Гайнуллин истәлегенә багышланды. Илгиз 53 яше тулганда Казанда бадминтон ярышы вакытында вафат булды. Сүз белән генә әйтеп бетерә алмаслык искиткеч кеше ид ул. Озак вакыт мәктәптә эшләде. Утар Аты мәктәбендә укыткан вакытында шахмат, теннис буенча түгәрәкләр алып бара. Үзе дә спорт белән шөгыльләнә. Бадминтон уйный. Авыл җирлеге башлыгы итеп билгеләнгәч тә бу шөгылен ташламый.

    Илгизне бар да бик яраткан булган икән. Ярышта катнашырга да бик күп кеше килде. Җанатарлар арасында хатыны Суфия ханым, кызы Зилә, Илгизнең бертуган, туганнан туган абыйлары, энеләре, кияүләре, аның белән бергә эшләгән авыл җирлекләре башлыклары бар иде.

    – Әтиебез истәлегенә шундый ярыш оештыручыларга зур рәхмәтебезне белдерәбез. Әтиебез белән чын күңелдән горурланабыз һәм аны хөрмәтләүләренә куанабыз. Бүген хисләребез кабат яңарды. Үткәннәр искә төште. Әти соңгы ярышына ашкынып чыгып китте. “Мин дә бармыйм, башка да. Кемдер катнашырга тиеш бит инде”, – диде. Бадминтон уенын бик ярата иде шул. Теннис, шахмат та уйнады, – диде кызы Зилә.

    Күз яшьләренә буылып, менә-менә елап җибәрәм, дип утырган Суфия ханымга сорау бирергә йөрәгем җитмәде. Шулай да ярышларны ачу тантанасында ул район җитәкчеләренә, оештыручыларга рәхмәтен белдерде. Ә ярышларны район башлыгы Илшат Нуриев ачып җибәрде, Илгиз Гайнуллин турында җылы итеп искә алды. Районыбыз мөхтәсибе Әмир хәзрәт Миңнемуллин мәрхүмнең рухына багышлап дога кылды.

    Моның кадәр кеше бадминтон белән кызыксына дип уйламый идем. Катнашучылар арасында 7 яшьтән алып 30 яшьтән өлкәнрәкләр дә бар иде. Ярышлар көчле барды. Шарты буенча бер кеше ике тапкыр җиңелгән очракта төшеп кала. Ә җиңү иң осталарга елмая. Бу көнге ярышта үз яшьтәшләре арасында Яңа Кырлайдан Алинә Ганиева, Хәсәшшәехтан Айзат Гафетдинов, Ислам Галиев, Ландыш Хаҗиева, бишенче гимназиядән Илфира Мәрдәнова, укучылар сараеннан Ранис Сафиуллин, Илүзә Мәгъсумова, агросәнәгать көллиятеннән Ирек Мортазин, “Арча” спорт комплексыннан Лилия Хисмәтова, Урта Пошалымнан Айнур Сафин беренче урыннарны яуладылар.

    Гөлсинә Зәкиева

    Реклама
    Нравится
    Поделиться:
    Реклама
    Комментарии (0)
    Осталось символов: