Җиңү вальсы аша – хәтер дәресе: Арчада балалар бакчалаларына йөрүче балалар вальс биеде

Быел Арчада узган «Каблучок» район бию бәйгесе аеруча дулкынландыргыч мохиттә үтте. Мәктәпкәчә белем бирү елы уңаеннан оештырылган чара Җиңү вальсына багышланды.

Районның мәктәпкәчә белем бирү учреждениеләреннән килгән 21 бию коллективы сәхнәдә үз чыгышларын тәкъдим итте. Кечкенә яшьтә булуларына карамастан, балаларның һәр чыгышында тарихи хәтергә хөрмәт, Туган илгә мәхәббәт һәм сугыш еллары буынына рәхмәт хисләре чагылыш тапты. Сәхнәдә сугыш еллары көйләре яңгырады, парлы вальслар алышынды, ә балаларның ихлас чыгышлары тамашачылар күңелендә тирән тәэсир калдырды.

Жюри әгъзалары һәр коллективның чыгышын югары бәяләп, бәйгенең төп нәтиҗәсе итеп дуслыкны, бердәмлекне һәм тарихи хәтерне саклауны атады. Бәйгедә катнашкан барлык 21 коллектив та призлы урыннарга һәм дипломнарга лаек булды.

Чарада катнашкан нәни биючеләргә, аларны әзерләгән педагогларга һәм хореографларга аерым рәхмәт сүзләре җиткерелде. Оештыручылар билгеләп үткәнчә, нәкъ менә мәктәпкәчә яшьтән балалар күңелендә Ватан тарихына хөрмәт, мәдәни мираска игътибар һәм патриотик кыйммәтләр тәрбияләнә.