Исерек килеш скутерга утырып йөрүе 60 яшьлек Илфатка кыйммәткә төшкән

Арча районында яшәүче 60 яшьлек Илфат Нәҗипов элегрәк, суд карары белән, автомобиль белән идарә иткәндә полиция хезмәткәренең медицина тикшерүе үткәрү турындагы таләбен үтәмәгән өчен административ җаваплылыкка тартылган булган. Ул вакытта суд 30 мең сум күләмендә штраф билгели, 1 ел 7 айга транспорт чаралары белән идарә итү хокукыннан мәхрүм итә.

Әмма ул тиешле нәтиҗә ясамый. 6 августта исерек хәлдә скутер белән идарә итә, Иске Кырлай авылы урамнары буйлап йөри. Шунда аны полиция хезмәткәрләре тоткарлый.

Суд бу юлы И.Нәҗиповны 80 сәгатьлек мәҗбүри эшкә тартырга, 2 елга транспорт чаралары белән идарә итү хокукыннан мәхрүм итәргә дигән хөкем карары чыгарды.

Радик Хәбибуллин,

Арча районы прокуроры өлкән ярдәмчесе,

юстиция киңәшчесе