Арча яңалыклары
Кошларны сыйлыйбыз
Балалар бакчасы, мәктәп укучылары кыш җитүен түземсезләнеп көтә. Бердән, кышкы саф һавада урамда еш уйналса, икенчедән, тәрбияче, укытучылары, әти-әниләре белән бергәләп табигатьне күзәтеп, өйрәнергә ярата балалар.
Арчаның 1 нче балалар бакчасына йөрүче нәниләр дә көтеп ала кышны. Ел саен бакчада кыш, табигать белән бәйле конкурслар уздырыла. Быел декабрь аенда “Кошлар өчен ашханә” конкурсы узды. Балалар әти-әниләре белән бергәләп, кошлар өчен җимлек ясап агачка элде. Хәзер урамга уйнарга чыккан саен шул ашханәләргә җимнәр салып, бергләп кошларның рәхмәт укый-укый ашауларын күзәтәбез.
Әлеге конкурста уртанчылар төркеменнән Рәйхан Шаһиевның җимлеге җиңүчеләр рәтенә керде.
Балаларны кечкенәдән кошларга, гомумән, табигатьтәге тереклеккә ярдәм итеп яшәргә кирәклеген аңлатып, табигатькә сакчыл караш тәрбияләү — бакча тәрбиячеләренең бурычы. Ә конкурска җимлек ясаган әти-әниләргә булышып балалар хезмәт дәресен дә уза — кулларына кадак, чүкеч тотып, такталарны тотып торып, эш коралларын да таный алар.
Гөлнара Зиннәтова, Ольга Шәрипова, Арчаның 1 нче балалар бакчасы тәрбиячеләре
Следите за самым важным и интересным в Telegram-каналеТатмедиа
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев