Көт кенә, мин кайтырмын

Халыкара хатын-кызлар көне уңаеннан Арча мәдәният йортында эчтәлекле дә, үзенчәлекле дә концерт булып узды.

Үзенчәлеге нидә? Ул махсус хәрби операциядә катнашучы райондашларыбызның әниләре, хатыннары өчен, аларны бәйрәм белән котлап оештырылды.

Чара мәдәният йорты фойесында урнашкан “Солдат әтисе” күргәзмәсе белән танышудан башланды. Ул тагын да тулыландырылган, махсус хәрби операция зонасында хезмәт иткән барлык егетләребез портретлары белән “Безнең егетләр – безнең батырлар” дигән тагын бер зур күләмле стенд өстәлгән. Балалары, ирләренең рәсемнәрен генә булса да карау аларны көткән аналар, хатыннар өчен үзе шатлык, горурлык. Исән-сау гына кайтсыннар да, шушы залда барысын бергә күрергә насыйп булсын.

Арча мәдәният йорты сәхнәсенә бер-бер артлы район сәнгать осталары чыкты. Һәрберсе матур җырларын җилкәләрендә көтү, сагыну, юксыну, кайберләре югалту кебек хисләрне күтәреп йөргән ханымнарга – егетләребезнең аналарына, хатыннарына багышлады. Расих Галимҗанов: “Кырыс ла тормыш юллары, авыр ла дөньялары, хәлләремне җиңеләйтә әнкәмнең догалары”, – дип җырлаганда кайсы гына ана күз яшьләрен тыеп кала алды икән.

Район башлыгы Илшат Нуриев залда утыручы барлык хатын-кызларны бәйрәм белән котлап, якыннарына булган мәхәббәтләре, ышанычлары өчен рәхмәт белдерде.

– Без бүген залга геройлар тәрбияләүгә өлеше кергән ханымнарны – әниләрне, әбиләрне, хатыннарын, апа-сеңелләрен, балаларын җыйдык. Һәм бүген без сезгә булганыгыз, геройларыбызны тәрбияләгәнегез өчен олы рәхмәтебезне белдерәбез. Без, балаларыбыз тыныч йокласын, алар шундый матур сәхнәләрдә бии, җырлый алсын өчен улларыгыз, ирләрегез, туганнарыгыз бүген тышкы дошманнан илебезне саклый. Юкка гына 2025 ел Ватанны саклаучылар елы, дип аталмады, – диде Илшат Нуриев. – Гуманитар ярдәм туплауда районда зур эш алып барыла. Әле ел башланды гына, әмма кыска гына вакыт эчендә ике колонна гуманитар ярдәм җибәрелде инде. Халык шулай күтәрелер дип көтмәгән идек. Волонтерлар, активистлар, гуманитар ярдәм оештыруга өлеше кергән һәр хатын-кызга рәхмәтемне белдерәм. Кайбер гаиләләргә югалту ачысы татырга да туры килде. Чын күңелемнән кайгыгызны уртаклашам. Егетләрнең урыннары оҗмахта булсын. Без аларны беркайчан да онытмаячакбыз.

“Сагынамын, яратамын сине, бәхетем син, минем йөрәк син”, – дип җырлады Гөлия Мөбарәкшина бу сүзләрне ире Фирзәргә багышлап. Фирзәр Мирҗәм егете. Мобилизациянең беренче көннәреннән үк махсус хәрби операция зонасына китте. Монда аны Гөлиясе, баласы, әнисе, туганнары сагынып көтә. “Көт кенә, мин кайтырмын”, – дип яза үзенең шигырендә Константин Симонов. Якыннарының мәхәббәтләре аларга һәрчак юлдаш булсын иде.

Сугыш хатын-кыз өчен түгел, диләр. Шуңа карамастан, Бөек Ватан сугышында күпме гүзәл зат дошманга каршы барган, геройлык үрнәкләре күрсәткән. Чынлыкта хатын-кыз тотынса, чабып барган атны да туктата, янган өйгә дә барып керә. Бүген дә махсус хәрби операция зонасына киткән кызларыбыз бар. Безнең районда алар өчәү. Шурабаш авылыннан Лада Уразаева, хәрби частьта шәфкать туташы. Арина Замашная, Ижевск шәһәрендә хастаханәдә эшли, 2024 елда гаиләсе белән Кәчегә күчеп кайта, махсус хәрби операция зонасына китә. Резедә Җәләева дә Кәчедән. 2004 елгы. 20 яшендә контракт төзеп махсус хәрби операция зонасына китә. Ул да хәрби частьта шәфкать туташы. Бу урында район башлыгы сүзләрен китерәсе килә: “Бердәм илне беркем дә җиңә алмый”.

Сәхнәдән җырлар агыла, биюләр башкарыла, бер-бер артлы чыгыш ясаучылар чыга. Һәрберсе күңеленнән солдатларыбызга исәнлек, аларны көтүче аналарга, хатыннары, якыннарына сабырлык тели. Дөрес түгел, димәс берәү дә. Чөнки барыбыз да якыннарыбызның, туганнарыбызның, сөйгәннәребезнең, газизләребезнең җиңү яулап кайтуын көтә. 9 Май көнне укырга да бармадык, көне буе бәйрәм иттек”, – дигән иде бер тыл ветераны. Тиз арада безгә дә җиңүне бәйрәм итү насыйп булса иде.