Мәктәп укучылары арасында традицион «Куркынычсыз тәгәрмәч» бәйгесе узды

27 апрель көнне районыбызда «Куркынычсыз тәгәрмәч-2024» бәйгесе үткәрелде. Чараның оештыручылары Арча районы мәгариф идарәсе, район буенча ЮХИДИ бүлеге, "Юл хәрәкәте иминлеге" дәүләт бюджет учреждениесы, ДОСААФ, җирле «Алдынгылар хәрәкәте» оешмасы, Укучылар сарае иде.

Бәйгедә районыбыз мәктәпләреннән килгән 30дан артык команда көч сынашты. 9-11 яшьлек юл хәрәкәтенең яшь инспекторлары алты төрле сынау аша уздылар. «Юл йөрү кагыйдәләрен белүчеләр», «Беренче ярдәм күрсәтүнең нигезләрен белү», «ОБЖ» бәйгеләре теоретик яктан белемнәрне тикшерсә, «Велосипедны фигуралы йөртү», «Автошәһәр» һәм «Агитбригада» иҗади бәйгесендә укучылар практик күнекмәләрен күрсәттеләр.

Барлык бәйгеләрнең нәтиҗәләре буенча 10 иң яхшы команда һәм өч җиңүче команда билгеләнде. Аларга истәлекле бүләкләр, дипломнар һәм медальләр тапшырылды. 

1 урын – Арчаның 1нче мәктәбе

2 урын – Шушмабаш мәктәбе

3 урын – Хәсәншәех мәктәбе

4 урын – Арчаның 7нче мәктәбе

5 урын – Сикертән мәктәбе

Иҗади бәйгедә Арчаның 1нче мәктәбе беренче, күппрофильле лицее икенче, Лесхоз мәктәбе өченче урынга лаек дип табылды.