Мәктәп-интернатка – 100 мең сумлык бүләк!

“Таттелеком” акционерлык җәмгыяте үзенең игелекле эшләре белән куандырып тора. 7 апрельдә Яңа Кенәр ярдәмче мәктәп-интернатка 100 мең сумлык продукция тапшыру тантанасы булды.

Бүләкләрне Арча РУЭСының яңа җитәкчесе Руслан Таһиров тапшырды. Директор Ленар Вәлиев коллектив исеменнән рәхмәт әйтте.

РУЭС җитәкчесе Яңа Кенәр авыл җирлеге башлыгы Рафаэль Фәхретдиновка җирлектә проблемалар булса, булышырга әзер икәнлекләрен белдерде. “Апрель аенда безнең  бушрак вакыт, андый мөмкинлек бар”, – диде.

Бу сүзләр башка җирлекләргә дә кагыла.

Бүләкләрне бу көнне мәктәп-интернатка гына түгел, Яңа Кенәрдә ярдәмгә мохтаҗ булган ялгыз яшәүче өлкәннәргә дә бирделәр.