Мөселман кешесенең бер помидор өчен бер-берсен рәнҗетүе оят (ифтардан соң туган уйлар)

Казанда 9 нчы Республикакүләм ифтар узды. Казан мәктәбендә фаҗига килеп чыгу сәбәпле, ифтарның программасына үзгәрешләр кертелде. Фаҗигадә һәлак булучыларны бер минут тынлык белән искә алдылар, Татарстан Президенты Рөстәм Миңнеханов аларның якыннарының кайгысын уртаклашты.

Оештыручылар ифтарга килгән кунакларга Татарстан Диния нәзарәте исеменнән Коръән басмасын бүләк итте. Аллаһы кабул итсен, барысы да әйбәт узды. 

Кайберәүләрнең үз-үзен тотышы гына гаҗәпкә калдырды. Артыбызда утырган яулыклы ике апаның этешкән-төртешкәнен күреп тын калдым. Баксаң, ризык өчен тарткалашалар икән. Ул да түгел помидорлар идәнгә тәгәрәп китте, бер берсенә яман әшәке сүзләр әйтә башладылар. Инде апайлар тынычланды дигән идем, бер бала: "Сезнең артык ризык калмадымы?"- дип һәр өстәл саен соранып йөри башлады. Мохтаж дияр идең, яхшы гына киенгән үзе.

Кунакларга бушлай таратылган Коръән басмасын 5-6 шар алучыларга да исең китәрлек. Йә Аллам, ачлык, ялангачлык заманы түгел, нигә шундый нәфесле соң без? Мөселман кешесенең бер помидор өчен бер-берсен рәнҗетүе оят. Раббым, үзең кичер.

Шәһри Казан