Наркотикларны рекламалаган өчен җаваплылык каралган

Йорт, бина диварларында, баганаларда төрле язулар күрергә мөмкин. Алар арасында наркотиклар сатылу турындагылары да күзгә чагыла.

Әлеге белдерүләрдә наркодилер белән элемтәгә керү өчен ICQ яисә телефон номеры, сайт яки телеграмканал адресы күрсәтелә. Шулай ук “тот-рыклы хезмәт хаклы” эш турында мәгълүмат булырга мөмкин. Гадәттә бу эш наркотиклар таратуга кайтып кала. Ә наркотиклар тараткан өчен 25 елга кадәр иректән мәхрүм итү каралган.

Мондый белдерүләр язу законсыз рекламага яки наркотикларны пропагандалауга керә. Әлеге гамәлләр өчен Россия Федерациясе Административ хокук бозулар турындагы кодексының 6.13нче маддәсе буенча административ җаваплылык каралган: гражданнарга – 4000 сумнан 5000 сумга кадәр, дәүләт хезмәтендәге кешеләргә һәм шәхси эшмәкәрләргә – 40000 сумнан 50000 сумга кадәр, юридик затларга 800000 сумнан 1 миллион сумга кадәр штраф салына.

Барлык очракларда да реклама продукциясе һәм аны әзерләү өчен җиһазлар конфискацияләнә, ә шәхси  эшмәкәрләр һәм юридик затлар өчен эшчәнлекне 90 тәүлеккә кадәр административ туктату күздә тотыла.

Динар Низамов,

район прокуроры ярдәмчесе, 1 класслы юрист