Рашат Салихҗанов: «Олы яшендә булуга карамастан, анда булган энергия һәм кешегә ярдәм итеп яшәве күпләрне сокландыра»

Алар ай саен диярлек махсус хәрби операция зонасына барып, егетләребезгә халыктан җыелган гуманитар ярдәмне тапшырып кайталар. Рашат Салихҗанов аның белән юлга чыгучы авылдашларына аеруча рәхмәтле. Олысы, кечесе бу эштә ярдәм итәргә әзер тора. 

“Октябрь ахырында авылыбызның актив кешеләренең берсе, спорт ветераны, 75 яшьлек Ришат Садиков та безнең белән барды. Өч машина идек. Ришат абый белән рульдә чиратлап бардык. Олы яшендә булуга карамастан, анда булган энергия һәм кешегә ярдәм итеп яшәве күпләрне сокландыра. Рәхмәт аңа. Шулай ук ул вакытта авыл җирлеге башлыгы Әгъзәм Гайфуллин, авылдашларым Алсу һәм Ленар Гариповлар, Симетбаш авылыннан Фаяз Әхмәдуллин һәм бервакытта да читтә калмаучы Гарифулла Әхмәтгалиев барды”, – диде Рашат Салихҗанов.
Кенәр волонтерлары бу баруда бер генератор, пиломатериаллар, 30 көрәк, 20 чиләк, 12 литрлы казан, 10 литр машина мае, 9 төргәк маскировка челтәрләре, медицина һәм төзелеш кирәк-яраклары, су баклары, яшелчәләр, кышка әзерләп куелган салатлар, мендәрләр, исемле посылкалар илтеп тапшыганнар.