Тәнзиләгә мәдхия

Өлкән буын кешеләре, Урта, Зур Бирәзәләр, Арчаның үзендә ярты гасырга якын кино куйган Тәнзиләне яхшы хәтерли. Ул чорда кино – гаять популяр иде. Яхшы фильмнарны икешәр-өчәр көн чират торып карадылар.

Тәнзилә Закирова туган авылы Урта Бирәзәдән җәяүләп менеп поездга утырып Казанга бара, шуннан күтәреп фильмнар алып кайта. Моның өчен күпме тырышлык кирәк. Аның хезмәтен югары бәяләделәр – Татарстанның, Россиянең атказанган киномеханигы исемнәрен йөртүче кешеләр тагын бармы икән!

Әле дә гел хәрәкәттә ул, көн дә диярлек редакциягә, радиога кереп хәлләрне белеп чыга. Ул кермәгән көннәрдә нәрсәдер җитми, дөньяның бер кырые китек кебек.