Халидә ханым искиткеч гүзәл җирдә кунакта булган

Бүген искиткеч гүзәл җирдә кунакта булып кайттым!
Арчаның 9нчы номерлы балалар бакчасына "Бер күрешү - үзе бер гомер" исемле очрашуга чакырулы идем. Бакча мөдире Мостафина Эльвира Габдулхаевна белэн өлкән тәрбияче Гарифзянова Гөлшат Данисовна ачык йөз белән каршы алдылар. Нәниләр өчен язылган шигырьләремне укырмын, дип барган идем, баксаң, бәләкәчләр үзләре минем шигырьләремне ятлап куйганнар, сәхнәләштереп тә өлгергәннәр.
Алай гына да түгел, биеп, җырлап үз һөнәрләрен дә күрсәттеләр. 
Монда чиксез талантлы, тәртипле акыллы балалар тәрбияләгәннәр. Татар теле тәрбиячелэре Гөлүсә Миннегалиевна белән Нурфия Робертовна һәм шулай ук тәрбиячеләрнең телебезне саклауга зур игътибар бирелгәнлеге сизелеп тора. Балалар татарча яхшы аңлыйлар, төгәл җаваплар бирә беләләр. Сөйләмнәре чиста, матур. 
Мин бу бакчага Дәү әни образында килдем һәм үз чиратымда, яулык турында, аның әһәмияте, элек татар кызлары башларына һәрчак яулык бәйләп йөргәннәре турында сөйләдем. Яулыкны төрле формада бәйләп була икәнлеген күрсәттем. Физзарядка да ясап алдык.
Әлбәттә инде кызыклы шигырьләремне укып,   җыентыгымны бүләк иттем. Соңыннан нәниләр мине үз  дәү әниләренә сыенган кебек, сырып алып кочакладылар, озак аерылыша алмый тордык.
   Бакчадан куанып, зур канәгатьлек, рәхәтлек, җан җылысы алып кайттым.

Халидә Фәйзрахманова, ветеран укытучы.