Юкка чыккан бәйрәмне ”эзләп тапканнар” (+фото)

Моннан 15 еллар элек, «8 март» колхозы булган чорларда, ул ел саен нәкь 8 мартта үткәрелгән. Әмма күмәк хуҗалык белән бергә бу бәйрәм дә юкка чыккан.

Быел ТүбәнАты һәм Урта Аты авыллары яшьләре элеккеге күркәм гадәтне яңадан кайтарырга планлаштыралар. Әйткән сүз, аткан ук. Яшьләр аны тормышка да ашыралар. Аларга бөтен авыл халкы ярдәмгә ашыга. Кемдер акчалата, икенчеләре әйберләтә булыша. Авыл җирлеге дә яшьләрнең бу уйларын хуплап каршы ала.

Нинди генә уеннар оештырмый Урта Аты һәм һәм Түбән Аты яшьләре. Чын Сабантуй инде. Милли һәм кул көрәше, өстәл теннисы, аркан тарту, чүлмәк вату, киез итекле футбол... Алып баручыларның шаян, дәртле сүзләре, халыкның дәррәү килеп, бердәм катнашулары, музыка, җыр-бию – бәйрәмне тагын да тулыландырып җибәрә.

– Милли көрәшне оештыруда Арча район советы депутаты Ринат Алиев башлап йөрде. Ә иганәче буларак Нотфуллиннар гаиләсе күтәреп чыкты. Тәкәне дә баш батырга нәкь алар тапшырды, – диде авыл җирлеге башлыгы Резеда Батталова. – Бу бәйрәмне яңадан традициягә кертеп җибәрергә тырышачакбыз.

Гөлсинә Зәкиева